თბილისი, 27 ოქტომბერი - Sputnik. რუსეთის პრეზიდენტი ვლადიმირ პუტინი მათ, ვინც ამტკიცებს, რომ მოსკოვს ბირთვული იარაღის გამოყენება შეუძლია, რუსეთის ფედერაციის სამხედრო დოქტრინის წაკითხვას ურჩევს.
მისი განმარტებით, მასში მკაფიოდ არის გაწერილი, თუ რა შემთხვევაშია შესაძლებელი რუსეთის მიერ ბირთვული იარაღის გამოყენება.
„რაც შეეხება რუსეთს, ჩვენ გვაქვს სამხედრო დოქტრინა და წაიკითხონ. სამხედრო დოქტრინის შესაბამის მუხლში ნათქვამია, რა შემთხვევაში, რა მიზეზით და რასთან დაკავშირებით მიიჩნევს რუსეთი მასობრივი განადგურების იარაღის გამოყენებას შესაძლებლად - ქვეყნის სუვერენიტეტის, ტერიტორიული მთლიანობის დაცვისა და რუსი ხალხის უსაფრთხოების უზრუნველყოფისთვის“, - განაცხადა პუტინმა ხუთშაბათს გამართულ „ვალდაის“ ფორუმზე.
ამასთან დაკავშირებით როგორც პრეზიდენტმა აღნიშნა, დასავლეთი ავრცელებს თეზისს რუსეთის მიერ ბირთვული იარაღის გამოყენების შესაძლებლობის შესახებ მოსკოვის მოკავშირეებსა და ნეიტრალურ სახელმწიფოებზე გავლენის მოხდენის მიზნით, მაგრამ ეს მიზანი პრიმიტიულია და არაფრისმომცემი.
„ისინი (დასავლეთი - Sputnik) ეძებენ დამატებით არგუმენტებს, რათა დაარწმუნონ ჩვენი მეგობრები ან ნეიტრალური სახელმწიფოები, რომ ყველა ერთად უნდა შეეწინააღმდეგოს რუსეთს“, - განაცხადა რუსეთის ლიდერმა.
ვლადიმირ პუტინმა ხაზგასმით აღნიშნა, რომ მოსკოვს არ სჭირდება ბირთვული დარტყმა უკრაინაზე.