ქართველმა ძალოსანმა ევროპის ჩემპიონატზე ოქროს მედალი მოიპოვა

ორჭიდის ჯამით ასანიძის შედეგია 322 კილოგრამი.
Sputnik
თბილისი, 19 ოქტომბერი – Sputnik ქართველმა ძალოსანმა, ეროვნული ნაკრების მთავარი მწვრთნელის გიორგი ასანიძის ვაჟმა კახი ასანიძემ ალბანეთში მიმდინარე იუნიორ ძალოსანთა ევროპის ჩემპიონატზე საქართველოს ნაკრებს ოქროს მედალი მოუტანა.
ევროპის ჩემპიონატი U20 და U23 ალბანეთის ქალაქ დიურესში 16-დან 25 ოქტომბრამდე მიმდინარეობს.
ორჭიდის ჯამით ასანიძის შედეგია 322 კგ. ქართველმა ძალოსანმა ატაცში მცირე ვერცხლი აიღო (146 კგ). სამივე ცდა წარმატებული გამოდგა - 141/144/146 კგ. აკვრაში კი ასანიძემ 176 კგ დაძლია.
​რაც შეეხება კიდევ ერთ ქართველ ძალოსანს, არჩილ მალაყმაძეს, მან ატაცში თავი 135 კილოგრამს გაართვა, რის შემდეგაც ტრავმის გამო შეჯიბრიდან მოიხსნა. საბოლოოდ, ძალოსანმა ევროპის ჩემპიონატი ატაცის მე-6 ადგილით დაასრულა.