რამდენი პატიმარია საქართველოში – ბოლო მონაცემები

თბილისი, 25 სექტემბერი – Sputnik. საქართველოს პენიტენციურ დაწესებულებებში, 2022 წლის 1 აგვისტოს მონაცემებით, 9.605 პატიმარი იმყოფებოდა, აქედან 328 - ქალია, ნათქვამია სტატისტიკის ეროვნული სამსახურის „საქსტატის“ მასალებში.

1 აგვისტოსთვის პატიმართა საერთო რიცხვი მოსახლეობის 0,26%-ს შეადგენდა. ამასთან 2.900 ადამიანი პატიმრობას მეორე და უფრო მეტი ვადით იხდის.

მსჯავრდებულთა ძირითადი ნაწილი 31-დან 49 წლამდე ასაკის ადამიანები არიან. საქართველოს ციხეებში ასევე 32 არასრულწლოვანი და 70 წელზე მეტი ასაკის 60 პირი იმყოფება.

მსჯავრდებულთა ყველაზე დიდი რაოდენობა რუსთავის №15 და გლდანის №17 დაწესებულებაში იმყოფება.

2022 წლის 1 აგვისტოსთვის განაჩენს ელოდებოდა 2 ათასამდე პატიმარი (უმრავლესობა 31-49 წლის პირები). გარდა ამისა, განაჩენს ელოდება 19 არასრულწლოვანი და 70 წელზე მეტი ასაკის 7 პირი.

მსჯავრდებულთა დიდი ნაწილი სასჯელს იხდის განსაკუთრებით მძიმე დანაშაულისთვის. ამასთან განსაკუთრებით მაღალი რისკის 172 პატიმარია. დანარჩენი მსჯავრდებულები სასჯელს დახურულ და ნახევრად ღია ტიპის პენიტენციურ დაწესებულებებში იხდიან.

საქართველოს ციხეებში მოთავსებულია 47 ქვეყნის 617 მოქალაქე, რაც მსჯავრდებულთა მთლიანი რაოდენობის 6,4%-ს შეადგენს. უცხოელ მსჯავრდებულთა ძირითადი ნაწილია მამაკაცები, თუმცა ქართულ საპატიმროებში 2 არასრულწლოვანი უცხოელი და 55 უცხოელი ქალი იმყოფება.

საქართველოში უცხოელთა მესამედი, რომლებიც არიან ბრალდებული ან სასჯელს იხდიან, არიან თურქეთის მოქალაქეები, შემდეგ მოდიან რუსეთის, აზერბაიჯანის, სომხეთისა და უკრაინის მოქალაქეები.

ასევე საქართველოს ციხეებში სასჯელს იხდიან აშშ-ის, საფრანგეთის, გერმანიის, ისრაელისა და სხვა ქვეყნების მოქალაქეები.

ციხეებში მყოფების გარდა, 21,5 ათასი მსჯავრდებული პირობით სასჯელს იხდის.

მათი ძირითადი ნაწილი მამაკაცებია. გარდა ამისა, პირობით სასჯელს იხდის 1,1 ათასი ქალი და 87 არასრულწლოვანი.

ასევე პირობით სასჯელს იხდის 312 უცხოელი, მათ შორის არიან რუსეთის, აზერბაიჯანის, თურქეთის, სომხეთის, უკრაინის, აშშ-ის, კანადისა და იტალიის მოქალაქეები.