თბილისი, 16 აგვისტო – Sputnik. მიმდინარე წლის 1 სექტემბრიდან საბანკო ბარათებზე სამგზავრო აბონემენტის დარიცხვა იქნება შესაძლებელი, განაცხადა თბილისის მერმა კახა კალაძემ სოციალურ ქსელში ვიდეომიმართვისას.
როგორც კალაძემ აღნიშნა, ამ დროისათვის შეთანხმება მიღწეულია მხოლოდ ორ ბანკთან – „თიბისი ბანკთან“ და „საქართველოს ბანკთან“. სისტემის ამოქმედების შემთხვევაში მომხმარებელს ცალკე სამგზავრო ბარათი აღარ დასჭირდება.
„თქვენს საბანკო ბარათზე მიბმული იქნება სამგზავრო ვადიანი აბონემენტი. ცალკე აბონემენტის შეძენა არ დაგჭირდებათ, ხოლო ვისაც უკვე ნაყიდი აქვს აბონემენტი, მათი მოქმედების ვადა როგორც კი ამოიწურება, მომდევნო შენაძენი შესაძლებელია განხორციელდეს პირდაპირ საბანკო ბარათზე“, – განაცხადა კახა კალაძემ.
საქართველოში 1 თებერვლიდან საზოგადოებრივი ტრანსპორტით მგზავრობის სააბონემენტო სისტემა ამოქმედდა: 90-წუთიანი ბარათი 1 ლარი ღირს, ერთდღიანი – 3 ლარი; ერთკვირიანი – 20 ლარი; ერთთვიანი – 40 ლარი; სამთვიანი – 100 ლარი; ექვსთვიანი – 150 ლარი; ერთწლიანი კი – 250 ლარი.
პენსიონერებისთვის, მასწავლებლებისთვის, სტუდენტებისა და მოქალაქეების გარკვეული კატეგორიებისთვის საზოგადოებრივი ტრანსპორტით მგზავრობა კვლავ 20 თეთრია, სოციალურად დაუცველებისთვის — 10 თეთრი.