თბილისში თანამედროვე ქართული კალიგრაფიის გამოფენა იხსნება

თბილისი, 27 ივლისი – Sputnik. თბილისში, მწერალთა სახლში 27 ივლისს იხსნება კალიგრაფისტის შოთა საგანელიძის ნამუშევრების პერსონალური გამოფენა „თანამედროვე ქართული კალიგრაფიული ხელოვნება“, იუწყებიან ორგანიზატორები.

ექსპოზიციაზე წარმოდგენილი იქნება ფერწერული ტილოები, კერამიკული და ხელით ნაქარგი ნამუშევრები, ასევე ქალის სამოსის კოლექცია კალიგრაფიულ-ორნამენტული ელემენტებით.

გამოფენა ეძღვნება საქართველოს ეროვნულ გმირს მარო მაყაშვილს. მისი პორტრეტი მწერალთა სახლში პირველად გამოიფინება.

შოთა საგანელიძე ფერწერაში უნიკალური მიმართულების შემქმნელია. ის თავის ნამუშევრებში იყენებს ქართული დამწერლობის სამ სახეობას (ასომთავრული, ნუსხური, მხედრული), რომლებიც იუნესკომ არამატერიალური კულტურული მემკვიდრეობის ნიმუშებად აღიარა.

კერძოდ, ქართული ანბანის ასოების მეშვეობით ოსტატი ქმნის ისტორიისა და ხელოვნების ცნობილი ქართველი წარმომადგენლების მინიმალისტურ პორტრეტებს.

შოთა საგანელიძის კოლექციაშია თამარ მეფის, შოთა რუსთაველის, მსახიობ სოფიკო ჭიაურელის, რეჟისორ სერგო ფარაჯანოვისა და ბევრი სხვა ცნობილი პიროვნების დახვეწილი და საოცარი ნამუშევარი.

გარდა ამისა, შოთა საგანელიძე ქმნის ქსოვილების ორიგინალურ დიზაინს ქართული ასოებით.