თბილისი, 17 ივნისი — Sputnik. კონტრაბანდისტებმა კოკაინის პარტია დაკარგეს, რომელიც ბანანის ყუთებში იყო დამალული — კონტრაბანდა შეცდომით ჩეხეთის სუპერმარკეტებში შეიტანეს, იუწყება გამოცემა Newsweek.
კონტრაბანდული კოკაინის პარტია, რომელიც 83 მილიონ დოლარად არის შეფასებული, პოლიციამ მას შემდეგ ამოიღო, რაც ჩეხეთის სუპერმარკეტების ქსელის თანამშრომლებმა ბანანის ყუთებში უცნობი ფხვნილის შემცველი პაკეტები აღმოაჩინეს. ცნობილია, რომ პროდუქცია ჩეხეთში კოლუმბიიდან შევიდა — ჰამბურგის პორტის გავლით.
სუპერმარკეტებში, სადაც თანამშრომლებმა კოკაინის შეფუთვები აღმოაჩინეს, ოპერატიულად გამოცხადდნენ კინოლოგიური სამსახურები და გამომძიებლები.
„ჩეხეთის საბაჟო სამმართველოსა და სხვა სტრუქტურებთან თანამშრომლობით ამ დროისათვის მიმდინარეობს ამ ადგილების შემოწმება და სხვა მოქმედებები. კრიმინალურმა გამომძიებლებმა დაადგინეს, რომ საქონელი ჩეხეთის რამდენიმე ქალაქში გადანაწილდა“, — ნათქვამია ადგილობრივი პოლიციის პრეს-სამსახურის განცხადებში.
სამართალდამცველების თქმით, ისინი საერთაშორისო უწყებებთან ითანამშრომლებენ, რათა გაირკვეს, ვინ არის ჩეხეთში შესული კონტრაბანდული კოკაინის მფლობელი. უფრო მეტიც, გამომძიებლებს აინტერესებთ, როგორ მოხვდა ბანანის ყუთებში დაფასოებული ნარკოტიკები ჰამბურგის პორტში, სადაც ის განაბაჟეს კიდეც.
წყარო: Newsweek