საქართველოში მსოფლიო საფოსტო კავშირის წერილების კონკურსის გამარჯვებულები გამოავლინეს

თბილისი, 14 ივნისი – Sputnik. საქართველოში მსოფლიო საფოსტო კავშირის (UPU) ეგიდით ჩატარებული საერთაშორისო ახალგაზრდული კონკურსის ეროვნული შესარჩევი ეტაპის გამარჯვებულები გამოვლინდნენ, იუწყება „საქართველოს ფოსტა“.

2022 წლის საკონკურსო თემა იყო „მისწერე წერილი გავლენიან ადამიანს, თუ რატომ და როგორ უნდა მიიღონ ზომები კლიმატის ცვლილებასთან დაკავშირებით”. კონკურსის მიზანია თანამედროვე ტექნოლოგიების ეპოქაში წერილის წერის ტრადიციის პოპულარიზაცია.

კონკურსში მონაწილეობის მიღება 9-15 წლის მოზარდებს შეეძლოთ. ღონისძიების ორგანიზატორი იყო „საქართველოს ფოსტა“, მხარდამჭერები – საქართველოს ეკონომიკისა და მდგრადი განვითარების სამინისტრო, განათლებისა და მეცნიერების სამინისტრო, ასევე გარემოს დაცვისა და სოფლის მეურნეობის სამინისტრო.

ჟიურის მიერ გამოვლინდა საუკეთესო სამეული, ასევე „საქართველოს ფოსტის“ და სხვა უწყებების რჩეულები:

აღსანიშნავია, რომ მიმდინარე წელს საქართველოს მასშტაბით კონკურსში მონაწილეობა მიიღო 400-მდე მოზარდმა. ყველა მონაწილე სიგელებითა და საჩუქრებით დაჯილდოვდა, აღნიშნეს „საქართველოს ფოსტაში“.

წერილის წერის საერთაშორისო კონკურსს საფუძველი ჩაეყარა 1971 წელს „მსოფლიო საფოსტო კავშირის" ტოკიოს კონგრესზე. წელს ის 50 წლის იუბილეს აღნიშნავს. ყოველწლიურად კონკურსში „მსოფლიო საფოსტო კავშირის“ წევრი ქვეყნებიდან მილიონობით მოზარდი მონაწილეობს.

ეროვნული ოპერატორები მართავენ კონკურსს „მსოფლიო საფოსტო კავშირის“ წევრ 192 ქვეყანაში. სხვადასხვა ქვეყნებში გამოვლენილი გამარჯვებულები საერთაშორისო მასშტაბით განაგრძობენ შეჯიბრს. გამარჯვებულ ქვეყანას „მსოფლიო საფოსტო კავშირის“ ჟიური გამოავლენს.

პირველი ადგილის მფლობელი წერილი გაიგზავნება „მსოფლიო საფოსტო კავშირში“ და ჩაერთვება საერთაშორისო საკონკურსო პროგრამაში. „მსოფლიო საფოსტო კავშირის” საერთაშორისო კონკურსში გამარჯვებული ავტორის/ქვეყნის დაჯილდოების ცერემონია გაიმართება 2022 წლის 9 ოქტომბერს, ფოსტის საერთაშორისო დღეს, „მსოფლიო საფოსტო კავშირის“ ცენტრალურ ოფისში (ბერნი, შვეიცარია).

წყარო - საქართველოს ფოსტა