ლეგენდარული ჯგუფი Queen-ის წევრები აცხადებენ, რომ ფრედი მერკურის შესრულებით აქამდე უცნობი კომპოზიცია იპოვეს და მას აუცილებლად გაავრცელებენ.
მუსიკოსებმა ჩანაწერი თავიანთ არქივებში აღმოაჩინეს. სიმღერა 1989 წელს არის ჩაწერილი.
„ჩვენ ფრედის პატარა მარგალიტი აღმოვაჩინეთ, რომლის შესახებაც აღარაფერი გვახსოვდა. ეს საოცრებაა და მას სავარაუდოდ სექტემბერში მოისმენთ“, – ნათქვამია განცხადებაში.
ფრედი მერკურიმ მუსიკალური კარიერა 1969 წელს დაიწყო. გამორჩეული ვოკალური მონაცემების მქონე ფრედი ათობით მსოფლიო ჰიტის ავტორია. გამოცემა Rolling Stone-მა 2008 წელს ის ყველა დროის საუკეთესო მომღერლებს შორის დაასახელა. მუსიკოსი შიდსის ფონზე განვითარებული პნევმონიით 1991 წლის 24 ნოემბერს გარდაიცვალა.