თბილისი, 29 აპრილი — Sputnik. ევროკავშირის სანქციებით გაყინული მილიარდ ევროზე მეტი რუსული აქტივები ირლანდიამ შესაძლოა უკრაინის აღსადგენად მიმართოს, განაცხადა საგარეო საქმეთა მინისტრმა საიმონ კოვენიმ.
„ევროკავშირის ზოგიერთმა წევრმა ქვეყანამ იმ აქტივების დაპატიმრება მოითხოვა, რომლებიც უკრაინასთან დაკავშირებით გაიყინა. მათი წინადადებით, ეს აქტივები, მათ შორის, უკრაინის აღდგენისთვის უნდა იყოს გამოყენებული. მე ღია ვარ ამ წინადადებისთვის", — განაცხადა მინისტრმა.
როგორც კოვენიმ აღნიშნა, ამ გადაწყვეტილების დამტკიცებამდე საჭიროა ვრცელი დისკუსია, რათა უზრუნველყოფილი იყოს მკაფიო და მყარი სამართლებრივი ბაზა.
თავის მხრივ, ირლანდიური ოპოზიციის წარმომადგენლებს გაყინული თანხების გამოყენება ირლანდიაში მყოფი უკრაინელი ლტოლვილებისთვის სურთ ჰუმანიტარული დახმარების სახით.
გავრცელებული ინფორმაციით, ირლანდიამ 1,2 მილიარდი ევროს ოდენობის რუსული აქტივები გაყინა.
მანამდე ევროკომისიამ განაცხადა, რომ ევროკავშირის სანქციების ფარგლებში თითქმის 30 მილიარდი ევროს ოდენობის რუსული და ბელარუსული აქტივები გაყინა, ასევე დაბლოკა 196 მილიარდის ტრანზაქციები.
რუსეთის პრეზიდენტ ვლადიმირ პუტინის თქმით, კოლექტიურმა დასავლეთმა რუსული აქტივების გაყინვით რეალურად ხაზი გაუსვა საკუთარი ვალუტების სანდოობას.