თბილისი, 6 აპრილი – Sputnik. საქართველოში მცურავი საპროცენტო განაკვეთის მქონე 191,8 ათასი კრედიტი გაძვირდა რეფინანსირების განაკვეთის 11%-მდე გაზრდის გამო, ნათქვამია არასამთავრობო ორგანიზაცია „საზოგადოება და ბანკების“ განცხადებაში.
საქართველოს ეროვნული ბანკის მონეტარული პოლიტიკის კომიტეტმა 30 მარტს რეფინანსირების განაკვეთის 10,5%-დან 11%-მდე გაზრდის გადაწყვეტილება მიიღო.
რეფინანსირების განაკვეთი – პროცენტის ოდენობაა წლიური გაანგარიშებით, რომელსაც საკრედიტო ორგანიზაციები ეროვნულ ბანკს მათთვის გამოყოფილი კრედიტებისთვის უხდიან. რეფინანსირების განაკვეთი ეროვნული ბანკის ფულად-საკრედიტო პოლიტიკის ძირითადი ინსტრუმენტია და საფინანსო სექტორში საბაზრო განაკვეთების ორიენტირად არის მიჩნეული.
რეფინანსირების განაკვეთის გაზრდის შედეგად გაძვირდა 8,6 მლრდ ლარის თანხის 191,8 ათასი კრედიტი. 1 მარტის მდგომარეობით, კრედიტები ლარში მცურავი განაკვეთით შეადგენდა მთლიანი საკრედიტო პორტფელის 40,5%-ს.
„მონეტარული პოლიტიკის კომიტეტის ამჟამინდელი გადაწყვეტილება ეკონომიკაში მიმდინარე ინფლაციური პროცესების წინააღმდეგ მიმართული გამკაცრებული პოლიტიკის გაგრძელებაა, რომელიც ეკონომიკაზე მოქმედი შიდა და გარე ფაქტორების ერთობლივი ეფექტითაა გამოწვეული“, – ნათქვამია ორგანიზაციის განცხადებაში.
რა კრედიტები გაძვირდა რეფინანსირების განაკვეთის გაზრდის გამო
კრედიტის სახე | კრედიტების რაოდენობა | მოცულობა, მლნ ლარი |
სამომხმარებლო | 84.900 | 1.182 |
იპოთეკური | 67.000 | 2.927 |
ბიზნეს–კრედიტი | 36.200 | 4.335 |
ავტოკრედიტი | 700 | 17 |
გაურკვეველი დანიშნულების | 3.000 | 89 |