თბილისი, 6 აპრილი — Sputnik. იმედი მაქვს, რომ ევროპის ქვეყნები კალინინგრადის გარშემო ავანტიურაში არ ჩაებმებიან, განაცხადა რუსეთის საგარეო საქმეთა მინისტრის მოადგილემ ალექსანდრ გრუშკომ.
მისი აზრით, ევროპის ნაბიჯები კალინინგრადის ბლოკირების მიზნით – „ცეცხლთან თამაში“ იქნება.
„ძალიან დიდი იმედი მაქვს, რომ საღად აზროვნება ევროპას მაინც არ მისცემს უფლებას, ჩაერთვნენ რაღაც თამაშში კალინინგრადთან დაკავშირებით. ვფიქრობ, ბევრს ესმის, რომ ეს ცეცხლთან თამაშია“, — უთხრა მინისტრის მოადგილემ ჟურნალისტებს.
მანამდე ლატვიამ განაცხადა, რომ შეუძლია კალინინგრადის ბლოკირება მოაწყოს რეგიონის იმ ქვეყნებთან ერთად, რომლებიც გარს აკრავენ მას. საუბარია ბალტიისპირეთის რესპუბლიკებსა და პოლონეთზე.
კალინინგრადი — ყოფილი კენიგსბერგი. დაარსდა 1255 წელს. საბჭოთა კავშირის შემადგენლობაში შევიდა 1945 წელს, ერთი წლის შემდეგ კი სახელი გადაერქვა. კალინინგრადი არის ნახევრადექსკლავი პოლონეთსა და ლიეტუვას შორის ბალტიის ზღვაზე. ქალაქი წარმოადგენს მსხვილ სატრანსპორტო კვანძს. მოიცავს სარკინიგზო და საავტომობილო მაგისტრალებს, საზღვაო და სამდინარო პორტებს. კალინინგრადში მდებარეობს რუსეთის საზღვაო ძალების ბალტიის ფლოტის შტაბიც.