თბილისი, 10 მარტი – Sputnik. თბილისის საქალაქო სასამართლომ სამოქალაქო აქტივისტისა და მოძრაობა „სირცხვილიას“ ერთ-ერთი დამფუძნებლის შოთა დიღმელაშვილის მიმართ ოთხდღიანი ადმინისტრაციული პატიმრობა გამოიყენა, ნათქვამია მოძრაობის განცხადებაში.
დიღმელაშვილი ადმინისტრაციული წესით 8 მარტს სახელმწიფო კანცელარიასთან მას შემდეგ დააკავეს, რაც მან შენობას კვერცხები ესროლა. ამ გზით გააპროტესტა მან ორშაბათის საღამოს თავისი თანამოაზრეების დაკავება.
ყველა აქტივისტი, მათ შორის დიღმელაშვილი, „ხულიგნობისა“ და „პოლიციის კანონიერი მოთხოვნისადმი დაუმორჩილებლობისთვის“ დააკავეს.
ორშაბათს მოძრაობა „სირცხვილიას“ ცხრა წევრი დააკავეს. მათ შორის გიგა მაქარაშვილი, ზუკა ბერძენიშვილი, ნოდარ რუხაძე, ბაჩი ვალიშვილი. მათ მოაწყვეს პარლამენტთან აქცია უკრაინის მხარდასაჭერად, შემდეგ კი მივიდნენ კანცელარიასთან, სადაც პრემიერ-მინისტრ ირაკლი ღარიბაშვილის გადადგომა მოითხოვეს.
დაკავებები მას შემდეგ დაიწყო, რაც აქციის მონაწილეებმა კანცელარიის შენობასთან პოლიციის კორდონს ტუალეტის ქაღალდები ესროლეს და პოლიციელებს ფქვილი შეაყარეს იმ მოტივით, რომ ის რუსული წარმოებისაა.
წყარო - მოძრაობა „სირცხვილია“