თბილისი, 17 თებერვალი — Sputnik. კანონმდებლებმა "წამლისა და ფარმაცევტული საქმიანობის შესახებ" კანონში დაგეგმილ ცვლილებებს, რაც იმპორტირებულ პროდუქტზე GMP სერტიფიკატის მოთხოვნას ითვალისწინებს, მესამე, საბოლოო მოსმენით დაუჭირეს მხარი, ნათქვამია პარლამენტის ვებ-გვერდზე გავრცელებულ განცხადებაში.
17 თებერვალს გამართულ პლენარულ სხდომაზე აღნიშნულ საკანონმდებლო ინიციატივას 78-მა დეპუტატმა დაუჭირა მხარი (ორის წინააღმდეგ).
კანონპროექტის მთავარი არსი იმპორტირებულ პროდუქტზე GMP სტანდარტით წარმოების დამადასტურებელი დოკუმენტაციის მოთხოვნაა.
ამ დრომდე საქართველოს კანონმდებლობით GMP სტანდარტი სავალდებულო წესით მხოლოდ ადგილობრივი წარმოების პროდუქციას მოეთხოვებოდა. 2022 წლის 1 იანვრიდან ძალაში შევიდა GMP-ს სრულად ამოქმედების მექანიზმი და მისი ეტაპობრიობა განისაზღვრა.
„მოქმედ კანონში ცვლილება იმ ფაქტმა განაპირობა, რომ კანონით უკვე ძალაში შესულია ადგილობრივი წარმოების მედიკამენტებზე GMP სტანდარტის მოთხოვნა. მნიშვნელოვანია, რომ ადგილობრივი მწარმოებლები და იმპორტიორები თანაბარ პირობებში იყვნენ", – ნათქვამია განცხადებაში.
„წამლისა და ფარმაცევტული საქმიანობის შესახებ" საქართველოს კანონში ცვლილების შეტანის თაობაზე" კანონპროექტი მთავრობის საკანონმდებლო ინიციატივა იყო და პარლამენტმა იგი დაჩქარებული წესით განიხილა.
აღნიშნული ცვლილება ხელს შეუწყობს ჯანსაღ კონკურენციას და თანაბარი მიდგომების უზრუნველყოფას ფარმაცევტული პროდუქტის მწარმოებლებს, საბითუმო რეალიზატორებსა და ფარმაცევტული პროდუქტის იმპორტიორებს შორის.
ჯანდაცვის სამინისტრომ ქვეყანაში წარმოებული და იმპორტირებული მედიკამენტების ხარისხის უზრუნველყოფის მიზნით GMP (კარგი საწარმოო პრაქტიკის) და GDP (კარგი დისტრიბუციის პრაქტიკის) სტანდარტების დანერგვა დაიწყო. შესაბამისად, ფარმაცევტულ კომპანიებს მოეთხოვებათ GMP და GDP სტანდარტების დაკმაყოფილება.
ქვეყანაში საერთაშორისო GMP სტანდარტზე გადასვლა ჯერ კიდევ 2016 წლიდან იგეგმებოდა, მაგრამ ფარმაცევტული დაწესებულებების თხოვნით ეს თარიღი ჯერ 2018 წლის 1 იანვრამდე, შემდეგ კი 2022 წლის 1 იანვრამდე გადავადდა.
GMP/GDP სისტემების დანერგვით საქართველო აღიარებს ევროკავშირის სტანდარტებს ფარმაცევტული პროდუქტების ხარისხის კონტროლის მიმართულებით.
GMP პრაქტიკა საქართველოს შესაძლებლობას მისცემს, გახდეს „ფარმაცევტული ინსპექციების თანამშრომლობის სისტემის" (PIC\S) წევრი, რომელშიც წარმოდგენილი არიან მედიკამენტების უმაღლესი ხარისხის სტანდარტების მქონე ქვეყნები.
წყარო: საქართველოს პარლამენტი