„ნეტფლიქსის“ სერიალმა The Crown ახლებურად და განსხვავებულად წარმოგვიდგინდა ბრიტანეთის სამეფო ოჯახის ცხოვრება. სერიალის მეოთხე სეზონში მაყურებელმა პრინცესა დიანას ცხოვრების ეპიზოდები იხილა.
სერიალში მოთხრობილი ამბები მიახლოებულია რეალურ ისტორიებთან. საზოგადოების განსაკუთრებული ყურადღება კი მიიპყრო ეპიზოდმა, სადაც პრინცესა დიანა სამეფო ოპერის თეატრში ცეკვავს. სერიალში დიანას როლს მსახიობი ემა კორინი ასრულებს. როგორც გაირკვა, ლედი დის თეატრში მართლაც უცეკვია ყველასთვის მოულოდნელად და საზოგადოების აღფრთოვანებაც დაუმსახურებია, თუმცა ამ ისტორიის შესახებ საზოგადოებამ ბევრი რამ არ იცის.
1985 წლის დეკემბერში პრინცი ჩარლზი და პრინცესა დიანა სპექტაკლს დაესწრნენ. სპექტაკლის მიმდინარეობისას პრინცესამ ჩუმად დატოვა თავისი ადგილი. ის მოულოდნელად სცენაზე გამოჩნდა და მოცეკვავე უეინ სლიფთან ერთად იცეკვა. მათ ბილი ჯოელის Uptown Girl-ის თანხლებით იცეკვეს. ეს სიმღერა დიანას არჩევანი იყო. დარბაზში 2500 ადამიანი იყო, რომლებიც გაოცებული უყურებდნენ პრინცესას. ადამიანები ისეთი გაოცებული და აღტაცებული ყოფილან, თითქოს არც სუნთქვადნენო.
სამწუხაროდ, დიანას ამ ცეკვის ამსახველი ვიდეოჩანაწერი არ არსებობს და მხოლოდ რამდენიმე შავ-თეთრი ფოტოა შემორჩენილი. პრინცესა დიანას ბიოგრაფი ტინა ბრაუნი ამბობს, რომ ლედი დის ცეკვით აღფრთოვანებული იყო პრინცი ჩარლზიც, თუმცა ამავდროულად იმედგაცრუებულიც. ამ ამბავზე საზოგადოება ბევრს საუბრობდა და ასეთი ქცევით „ხალხის პრინცესამ“ სამეფო ეტიკეტის წესები დაარღვია.