თბილისი, 18 დეკემბერი — Sputnik. კორონავირუსის ახალი შტამი - „ომიკრონი“ უკვე მსოფლიოს 89 ქვეყანაში გამოვლინდა, ნათქვამია ჯანდაცვის მსოფლიო ორგანიზაციის (ჯანმო) განცხადებაში.
„2021 წლის 16 დეკემბრის მდგომარეობით, „ომიკრონის“ ვარიანტი ჯანმოს ექვსივე რეგიონის 89 ქვეყანაშია აღმოჩენილი“, - ნათქვამია განცხადებაში.
ორგანიზაციის მონაცემებით, „ომიკრონი“ გაცილებით სწრაფად ვრცელდება „დელტა“ შტამთან შედარებით, რასაც მოწმობს მონაცემები საზოგადოების შიგნით დოკუმენტურად დადასტურებული გადაცემის შესახებ. ორგანიზაციის ინფორმაციით, 1,5-3 დღეში შემთხვევების რაოდენობა ორმაგდება.
გარდა ამისა, ახალი შტამი სწრაფად იზრდება მაღალი დონის პოპულაციური იმუნიტეტის მქონე ქვეყნებში, რისი ზუსტი მიზეზებიც ჯერჯერობით უცნობია.
„ომიკრინი“ გამოვლინდა უკვე საქართველოს მეზობელ ქვეყნებში - რუსეთსა და თურქეთში, საქართველოში კი 10 საეჭვო შემთხვევას სწავლობენ.
„ომიკრონი" არის COVID-19-ის ახალი შტამი, რომელიც ჯანმომ დაახასიათა, როგორც „შემაშფოთებელი". ჯერჯერობით მსოფლიოს მასშტაბით ამ შტამით ინფიცირების შედეგად გარდაცვალების ერთადერთი შემთხვევაა დაფიქსირებული დიდ ბრიტანეთში.