თბილისი, 16 ნოემბერი - Sputnik. საქართველოს ფუტსალის ნაკრებმა, რომელიც სადებიუტო ევროპის ჩემპიონატისთვის ემზადება, რუმინეთთან ამხანაგური მატჩი გამართა და დიდი ანგარიშით 4:1 იმარჯვა.
საქართველოს ნაკრების მხრიდან დუბლი შეასრულა ვახტანგ კეკელიამ, ხოლო თითო გოლი გაიტანეს ირაკლი თოდუამ და ბრუნო პეტრი ბრანკომ. რაც შეეხებათ სტუმრებს, რუმინეთის ნაკრებიდან ერთადერთი, პრესტიჟის გოლი პაულუ ფერეირამ შეაგდო.
ნაკრებები თბილისის ოლიმპიურ სასახლეში ხვალ კიდევ ერთ შეხვედრას გამართავენ. მატჩი 16:00 საათზე დაიწყება და ქვეყანაში არსებული რეგულაციებიდან გამომდინარე ტრიბუნაზე მაყურებელი ამჯერადაც არ დაიშვება.
საქართველოს ფუტსალის ნაკრები 2022 წლის ევროპის ჩემპიონატზე D ჯგუფში ითამაშებს, სადაც ესპანეთს, აზერბაიჯანსა და ბოსნია-ჰერცეგოვინას დაუპირისპირდება. მეოთხედფინალის საგზურს ჯგუფის 2 საუკეთესო ნაკრები მიიღებს.
2022 წლის ევროპის ჩემპიონატი ნიდერლანდებში 19 იანვრიდან 6 თებერვლის ჩათვლით გაიმართება.