თბილისი, 6 ნოემბერი – Sputnik. კოსტა-რიკა გახდა პირველი ქვეყანა, სადაც 5-დან 11 წლამდე ასაკის ბავშვებისთვის კორონავირუსის საწინააღმდეგო ვაქცინაცია სავალდებულო გახდა, იუწყება ქვეყნის ჯანდაცვის სამინისტრო.
„ბავშვთა და მოზარდთა საუკეთესო ინტერესების უზრუნველყოფის პრინციპის შესაბამისად <...> ვაქცინაციისა და ეპიდემიოლოგიის ეროვნულმა კომისიამ მიიღო გადაწყვეტილება, რომ კორონავირუსის საწინააღმდეგო ვაქცინაცია სავალდებულო ხდება ყველა არასრულწლოვანისთვის“, - აცხადებენ სამინისტროში.
კოსტა-რიკაში ჩუტყვავილას, პოლიომიელიტის და ადამიანის პაპილომავირუსის საწინააღმდეგო ვაქცინაცია სავალდებულოა არასრულწლოვანთათვის. ახლა ჩამონათვალს ასევე COVID-19-ის საწინააღმდეგო ვაქცინაცია დაემატა.
როგორც ქვეყნის ჯანდაცვის სამინისტროში აღნიშნეს, 12-19 წლის მოზარდების 73% უკვე აცრილია ვაქცინის მინიმუმ ერთი დოზით. უმცროსი ასაკის ბავშვების ვაქცინაციისთვის, რომელიც 2022 წლის მარტში დაინერგება, ხელისუფლება კომპანია Pfizer-ისგან პრეპარატის თითქმის 4 მილიონ დოზას შეიძენს.
ადრე, აშშ-ს მარეგულირებლებმა FDA-მ და CDC-მა ბავშვებისთვის Pfizer-ის ვაქცინები დაამტკიცეს. მიუხედავად იმისა, რომ გართულებები და მით უფრო სიკვდილიანობა COVID-19-ით იშვიათია არასრულწლოვანთა შორის, კორონავირუსით ინფიცირების ყველა შემთხვევის დაახლოებით მეოთხედი სწორედ მათზე მოდის.