უკრაინის რადას დეპუტატი ლიზა იასკო სოციალურ ქსელში გიული ალასანიასთან ერთად გადაღებულ ფოტოებს აქვეყნებს და წერს, რომ მიხეილ სააკაშვილის დედა შეხვედრებისთვის კიევში ჩავიდა.
იასკოს თქმით, ისინი ერთად შეხვდნენ უკრაინის ომბუდსმენს ლუდმილა დენისოვას და უკრაინის იუსტიციის მინისტრს დენის მალიუსკას, რადგან, პირველ რიგში, გიული ალასანიას სურს, რომ მიხეილ სააკაშვილი ჯანმრთელად და უსაფრთხოდ იყოს და, როგორც უკრაინის მოქალაქე, დაბრუნდეს უკრაინაში, რადგან მას საქართველოში კლავენ.
როგორც იასკო წერს, დღეს უკრაინის ხელისუფლებამ და საერთაშორისო საზოგადოებამ გადამწყვეტად უნდა იმოქმედონ სააკაშვილის სიცოცხლისა და ჯანმრთელობის დასაცავად, რადგან დრო იწურება და ნებისმიერ წუთს შეიძლება შეუქცევადი ცვლილებები მოხდეს.
ლიზა იასკომ მიხეილ სააკაშვილის დაპატიმრების შემდეგ სოციალურ ქსელში ექს-პრეზიდენტთან ერთად გადაღებული ვიდეო გამოაქვეყნა, რომელშიც სააკაშვილი ამბობდა, რომ ისინი ერთად ცხოვრობენ და ერთ ოჯახს წარმოადგენენ. მალევე რადას დეპუტატი საქართველოში ჩამოვიდა და მეუღლე ციხეში არაერთხელ მოინახულა.
მიუხედავად იმისა, რომ მიხეილ სააკაშვილმა ციხიდან კიდევ ერთხელ გაავრცელა განცხადება მისი და ლიზას თანაცხოვრების შესახებ, ექს-პრეზიდენტის მშობლები ახალი რძლის შესახებ ინფორმაციას არ ფლობდნენ. ჟურნალისტებთან საუბრისას გიული ალასანიამ აღნიშნა, რომ ლიზა იასკოს არ იცნობდა.
მოგვიანებით ლიზა იასკომ უკრაინელ ჟურნალისტთან ინტერვიუში განაცხადა, რომ მან და მიხეილ სააკაშვილმა მაშინ დაიწყეს ურთიერთობა, როდესაც ის და სანდრა რულოვსი უკვე დაშორებული იყვნენ.