მსახიობმა ალეკ ბოლდუინმა გადასაღებ მოედანზე ოპერატორ გალინა ჰატჩინსის ტრაგიკულად დაღუპვის შემდეგ საჯარო კომენტარი პირველად გააკეთა. მან გააჩერა მანქანა, რომელსაც პაპარაცები აედევნენ და მათ გაესაუბრა. პაპარაცებმა ის მეუღლესთან ჰილარისთან ერთად გადაიღეს.
„ის ჩემი მეგობარი იყო. იმ დღეს მე ის ვახშამზე მივიწვიე, ძალიან კარგად შეკრული გუნდი ვიყავით და მერე ეს საშინელება დატრიალდა. ის რაც მოხდა, ტრილიონში ერთი შემთხვევაა“, – აცხადებს მსახიობი.
ბოლდუინის თქმით, ის იარაღის გამოყენების წესების გამკაცრებას უჭერს მხარს. საუბრის ბოლოს მსახიობმა პაპარაცებს სთხოვა, აღარ აედევნონ მის ავტომობილს, რომელშიც მისი შვილები ტირიან.
22 ოქტომბერს ნიუ-მექსიკოს შტატში, ვესტერნ Rust-ის გადასაღებ მოედანზე უბედური შემთხვევა მოხდა. მსახიობ ალეკ ბოლდუინის მიერ გასროლილ იარაღს ოპერატორ გალინა ჰატჩინსის სიცოცხლე შეეწირა, ასევე დაიჭრა რეჟისორი ჯოელ სოუსა.
ფაქტთან დაკავშირებით შერიფმა განაცხადა, რომ ჯერჯერობით ბრალი ოფიციალურად არავისთვის წაუყენებიათ. რეჟისორის თანაშემწემ დეივ ჰოლსმა აღიარა, რომ იარაღი ალეკ ბოლდუინს ისე გადასცა, რომ ის არ შეუმოწმებია და მის უსაფრთხოებაში არ დარწმუნებულა.