თბილისი, 30 ოქტომბერი - Sputnik. საქართველოს მეოთხე პრეზიდენტმა გიორგი მარგველაშვილმა საკუთარი არჩევანი მთაწმინდის მე-6 საარჩევნო უბანზე, ჩიტაძის ქუჩაზე დააფიქსირა.
როგორც გიორგი მარგველაშვილმა ჟურნალისტებს განუცხადა, მან ხმა ოპოზიციურ ცვლილებებს მისცა.
„მივეცი ხმა ჩემს უბნელს. მე მივეცი ხმა იმას, რომ თბილისში, ჩემს ქალაქში დასრულდეს ძარცვა და ადამიანის ქონების და ღირსების მიტაცება. ღვთის მადლით, საქართველოში უზენაესი არის საქართველოს მოქალაქის ნება“, - განაცხადა მარგველაშვილმა.
საქართველოს ყოფილმა პრეზიდენტმა მოსახლეობას არჩევნებში მონაწილეობისკენ მოუწოდა. მან აღნიშნა, რომ საქართველოს თითოეულმა მოქალაქემ საკუთარი არჩევანი უნდა დააფიქსიროს.
საქართველოში დღეს ადგილობრივი თვითმმართველობის არჩევნების მეორე ტური მიმდინარეობს.
ქვეყნის მოსახლეობა 20 მერს და საკრებულოების 42 მაჟორიტარ დეპუტატს აირჩევს.
ქვეყანაში მეორე ტურისთვის 1.830 საარჩევნო უბანი გაიხსნა. მათ შორის პენიტენციურ დაწესებულებებში 6 და კოვიდ-ცენტრებში, საკარანტინო სივრცეებსა და თვითიზოლაციაში მყოფი პირებისთვის 29 სპეციალური საარჩევნო უბანი.
თვითმმართველობის არჩევნების პირველი ტური საქართველოში 2 ოქტომბერს ჩატარდა.