თბილისი, 25 სექტემბერი- Sputnik. საქართველოს პრეზიდენტმა სალომე ზურაბიშვილმა სამძიმარი გამოუცხადა საფრანგეთის პრეზიდენტ ემანუელ მაკრონს მალიში სამხედრო მოსამსახურის დაღუპვის გამო.
სამთო მსროლელთა მეშვიდე ბატალიონის უფროსი კაპრალი მაქსიმ ბლასკო მალიში შეიარაღებული ტერორისტების დაჯგუფებასთან შეტაკების დროს მოკლეს.
„ვუსამძიმრებ ემანუელ მაკრონს და სრულიად საფრანგეთს. ტერორიზმის წინააღმდეგ ბრძოლა ჩვენი საერთაშორისო საზოგადოების პასუხისმგებლობა და ასევე, სიმამაცის დადასტურებაა. საქართველო განაგრძობს საჰელის რეგიონში სტაბილურობისათვის გაწეული ძალისხმევის მხარდაჭერას“, – დაწერა ზურაბიშვილმა თავის Twitter-აკაუნტში.
ევროკავშირის ეგიდით არსებული სამშვიდობო მისია მალიში 2013 წლიდან ფუნქციონირებს. ის ითვალისწინებს ამ აფრიკული ქვეყნის შეიარაღებული ძალების წვრთნას და EUTM Mali-ს სახელწოდებას ატარებს. თავდაპირველად მისიის მანდატი ორი წლით შემოიფარგლებოდა, მოგვიანებით ევროკავშირმა მისი გახანგრძლივების გადაწყვეტილება მიიღო.
საქართველოს შეიარაღებული ძალები მალიში 2016 წლის იანვრიდან წარმოდგენილია ერთი მეკავშირე ოფიცრით, რომლის საქმიანობის სფერო ითვალისწინებს თანამშრომლობას იქ არსებულ მისიებთან, საერთაშორისო და არასამთავრობო ორგანიზაციებთან, ინფორმაციის გაცვლა-გამოცვლას და ასევე სამხედრო და სამოქალაქო თანამშრომლობის საკითხების (CIMIC) კოორდინაციაა და განხორციელებას.
ქართველი ოფიცერი მალიში მისიის დასრულებამდე დარჩება.