თბილისი, 23 სექტემბერი - Sputnik. გაეროს ადამიანის უფლებათა მისია შეშფოთებულია უკრაინაში დაწესებული სანქციებით ოპოზიციური მედიის წინააღმდეგ, იუწყება РИА Новости.
მისიის ხელმძღვანელის, მატილდა ბოგნერის თქმით, ეს სანქციები ხელისუფლების დამოუკიდებელ ორგანოს არ მიუღია.
„ადამიანის უფლებათა უმაღლესი კომისრის ოფისი შეშფოთებულია იმით, რომ ეს გადაწყვეტილებები არ შეესაბამება საერთაშორისო სტანდარტებს აზრის გამოხატვის თავისუფლების უფლების შესახებ, ვინაიდან ისინი არ იქნა მიღებული ხელისუფლების დამოუკიდებელი ორგანოების მიერ და ვერ ასაბუთებს ამ შეზღუდვების პროპორციულობას”, - განაცხადა მისიის ხელმძღვანელმა მატილდა ბოგნერმა ბრიფინგზე.
აგვისტოში უკრაინის ეროვნული უშიშროებისა და თავდაცვის საბჭომ (NSDC) გადაწყვიტა სანქციების დაწესება გამოცემა Strana.UA–ს მთავარი რედაქტორის, იგორ გუჟვას წინააღმდეგ. თავად მთავარმა რედაქტორმა განაცხადა, რომ გამოცემა გააგრძელებს მუშაობას, მიუხედავად NSDC-ის სანქციებისა. გარდა ამისა, უკრაინის ეროვნული უშიშროებისა და თავდაცვის საბჭოს მდივანმა ალექსი დანილოვმა განაცხადა, რომ საბჭოს სხდომაზე გადაწყდა ბლოგერი ანატოლი შარიის წინააღმდეგ სანქციების დაწესება.
თებერვალში უკრაინის პრეზიდენტმა ვლადიმირ ზელენსკიმ აამოქმედა NSDC–ის გადაწყვეტილება 5 წლის ვადით სანქციების დაწესების შესახებ ტელეარხების „112 უკრაინა“ NewsOne და ZIK-ის, ასევე უმაღლესი რადას დეპუტატის „ოპოზიციური პლატფორმის - სიცოცხლისთვის“ ფრაქციიდან ტარას კოზაკის წინააღმდეგ, რომელიც ფლობს აღნიშნულ არხებს. სანქციების ქვეშ მოხვედრილი სატელევიზიო არხები ხელისუფლების მიმართ ოპოზიციურად განწყობილია, ისინი ასოცირდება უკრაინული პარტიის „ოპოზიციური პლატფორმა - სიცოცხლისთვის" პოლიტიკური საბჭოს თავმჯდომარესთან ვიქტორ მედვედჩუკთან. პარტიამ ეს გადაწყვეტილება დაგმო და დიქტატურის გამოვლინებად და სიტყვის თავისუფლების ხელყოფად შეაფასა. ტელეარხებმა მაუწყებლობა შეწყვიტეს.