თბილისი, 21 სექტემბერი – Sputnik. რთველი რაჭის რეგიონში ოქტომბრის პირველ ნახევარში დაიწყება, იუწყება ღვინის ეროვნული სააგენტო.
უწყების ცნობით, რთვლის საკოორდინაციო შტაბი ქალაქ ამბროლაურში გაიხსნება.
„ადგილწარმოშობის ღვინო „ხვანჭკარის“ ჯიშობრივი სიზუსტის დაცვა და ხარისხის უზრუნველყოფა ღვინის ეროვნული სააგენტოს ერთ-ერთი ყველაზე პრიორიტეტული მიმართულებაა“, – აღნიშნავენ ღვინის ეროვნულ სააგენტოში.
„ხვანჭკარის“ ხარისხისა და უნიკალურობის დასაცავად რაჭაში უკვე დაწყებულია სპეციალური ღონისძიებები.
რაჭის რეგიონის შესასვლელებში მოეწყო სპეციალური საკონტროლო პუნქტები. შემოწმდება რეგიონში შემოსული ყველა მანქანა, რათა არ მოხდეს ყურძნის სხვა მუნიციპალიტეტებიდან შემოტანა.
ამავე მიზნით რთვლის დაწყებისთანავე ყურძნის მიმღებ ყველა პუნქტზე ამპელოგრაფები მონიტორინგს გაუწევენ ჩასაბარებელ ყურძენს, რათა არ მოხდეს სხვა ჯიშების შერევა „ხვანჭკარის" სანედლეულო ჯიშებში – მუჯურეთულში და ალექსანდროულში.
ყურძნის მოსავლის დაბინავების პარალელურად უპირველეს ამოცანად რჩება ქართული ღვინის, რაჭის შემთხვევაში კი განსაკუთრებით ღვინო „ხვანჭკარის“ ხარისხის უზრუნველყოფა და უნიკალური თვისებების შენარჩუნება, აღნიშნავენ სააგენტოში.