თბილისი, 19 სექტემბერი – Sputnik. საქართველოში კორონავირუსის საწინააღმდეგო ვაქცინაციის ტემპი საგანგაშოდ შემცირდა, განაცხადა დაავადებათა კონტროლისა და საზოგადოებრივი ჯანმრთელობის ეროვნული ცენტრის ხელმძღვანელმა, ამირან გამყრელიძემ „პირველი არხის“ ეთერში.
მისი თქმით, ბოლო სამი-ოთხი დღის განმავლობაში იკლებს ვაქცინაციის ტემპი, ისევე როგორც პირბადის ტარების მაჩვენებელი, რომელიც 47%-დან 43%-მდე ჩამოვიდა.
„შესაძლოა საშიში ტენდენცია გაჩნდეს და თუ ჩვენ ვერ ავწიეთ პირბადის ტარების და აცრების მაჩვნებელი, სამწუხაროდ ამ მაღალ ციფრებზე ისევ დავრჩებით. მეხუთე ტალღა იქნება შედარებით მსუბუქი, იოლი, თუ ჩვენ გვექნა აცრების მაღალი მაჩვენებელი და სექტემბერ-ოქტომბერში ავცრით სულ მცირე 700-900 ათას ადამიანს ყოველთვიურად“, - განაცხადა ამირან გამყრელიძემ.
საქართველოში მასობრივი ვაქცინაცია 5 ივლისს დაიწყო, მას შემდეგ, რაც ქვეყანამ ჩინური წარმოების Sinopharm-ის და Sinovac-ის ვაქცინების მილიონი დოზა მიიღო. ამ დროისათვის ქვეყანაში პრეპარატ Pfizer-ით 16 წლიდან პირთა ვაქცინაცია მიმდინარეობს. რაც შეეხება 18 წლის და ზემოთ ასაკის პირებს, მათ არჩევანის გაკეთება შეუძლიათ პრეპარატ Pfizer-ს, Sinopharm-სა და Sinovac-ს შორის. AstraZeneca-ს არჩევა 45 წელს ზემოთ პირებს შეუძლიათ.
19 სექტემბრის მონაცემებით, ქვეყანაში სულ ჩატარებულია 1.646.441 აცრა. სრულად (ორჯერადად) ვაქცინირებულია 701.150 ადამიანი – ზრდასრული მოსახლეობის 24,6%. 18 სექტემბერს აიცრა 14.071 ადამიანი. 17 სექტემბერს - 19.273, 16 სექტემბერს - 19.158. 15 და 14 სექტემბერს ეს მაჩვენებელი 25 ათასს აჭარბებდა.