თბილისი, 14 სექტემბერი – Sputnik. ვაქცინაციის წამახალისებელი ლატარიის „აიცერი და მოიგე“ ერთ-ერთი პირველი გამარჯვებული 91 წლის ბლოგერი ლამარა აბჟანდაძეა. ამის შესახებ აბჟანდაძემ საკუთარ Facebook-გვერდზე დაწერა.
ლამარა აბჟანდაძე ერთ-ერთი პირველია, რომელმაც AstraZeneca-ს პრეპარატით კორონავირუსის საწინააღმდეგო აცრა ჩაიტარა.
„ამ დილით ჩემმა შვილიშვილმა პირადობის ნომერი მომთხოვა და მალე მახარა – ბებო, 100 ლარი მოიგეო. ეს ლატარია აცრილებზე ყოფილა. მე ერთ-ერთმა პირველმა ავიცერი... ვინც აცრილები ხათ, შეამოწმოთ საიტზე მოიგეთ თუ არა“, – დაწერა ლამარა აბჟანდაძემ.
91 წლის აბჟანდაძემ მოქალაქეებს ვაქცინაციის პროცესში აქტიური ჩართვისკენ და გათამაშებაში მონაწილეობისკენ მოუწოდა.
ვაქცინაციის წამახალისებელი ლატარია გუშინ დაიწყო, დღეს პირველი გათამაშება გაიმართა და შედეგები პორტალ stopcov.lotto.ge-ზე გამოქვეყნდა.
StopCovid ლატარიაში მონაწილეობის მიღება შეუძლიათ როგორც 13 სექტემბრამდე სრულად ან ერთჯერადად ვაქცინირებულ პირებს, ისე იმ მოქალაქეებს, რომლებიც მასობრივ ვაქცინაციაში ჩაერთვებიან.
ლატარიის გათამაშებები ვებ-გვერდზე www.stopcov.lotto.ge ყოველდღიურად გაიმართება 12:00 საათზე, ყოველკვირეული – ორშაბათობით, 12:00 საათზე, ხოლო შემაჯამებელი გათამაშება 31 დეკემბერს გაიმართება.
მოგების გადამოწმება ვაქცინირებულ მოქალაქეებს stopcov.lotto.ge-ზე პირადი ნომრით შეუძლიათ. მონაცემები ყოველდღიურად განახლდება.