თბილისი, 30 აგვისტო – Sputnik. პენიტენციურ დაწესებულებებში კორონავირუსთან დაკავშირებული სიტუაცია არის სრულად კონტროლირებადი, რაიმე განსაკუთრებული საჭიროება არ გვაქვს, განაცხადა საქართველოს ჯანდაცვის მინისტრის მოადგილემ თამარ გაბუნიამ.
როგორც მინისტრის მოადგილემ აღნიშნა, პენიტენციურ დაწესებულებებში ვაქცინაციის პროცესი მაისიდან მიმდინარეობს და ამ დროისათვის ერთჯერადად ვაქცინირებულია პატიმრების 66%, ორჯერ კი 55%-ზე მეტი.
რაც შეეხება თანამშრომლების ვაქცინაციას, გაბუნიას განცხადებით, ეს პროცესი აპრილის ბოლოდან დაიწყო და თანამშრომლების 80%-ზე მეტია ერთჯერადად ვაქცინირებული, 62%-მდე კი ორჯერ ვაქცინირებული.
„ამგვარი ვაქცინაციის პირობებში ინფექციის გადაცემის ალბათობა არის საკმაოდ დაბალი. მოხდა რამდენიმე კლინიკის მობილიზაცია, რომ თუ საჭიროება დადგება, მოხდეს პატიმრების გადმოყვანა და მათი იქ მკურნალობა“, – განაცხადა გაბუნიამ.
17 აგვისტოს მონაცემებით, სპეციალური პენიტენციური სამსახურის პენიტენციურ დაწესებულებებში 9.300-მდე პატიმარი იმყოფება.