თბილისი, 24 აგვისტო – Sputnik. კომუნიკაციების კომისიამ და ევროკავშირმა დეზინფორმაციასთან გამკლავების მიმართულებით საქართველოს მასშტაბით 100-ზე მეტი პედაგოგი გადაამზადა, ნათქვამია კომინიკაციების კომისიის მიერ გავრცელებულ განცხადებაში.
პედაგოგები გადამზადდნენ კომუნიკაციების კომისიისა და ევროკავშირის ერთობლივი პროექტის ფარგლებში – „დეზინფორმაცია, როგორც გამოწვევა: კრიტიკული აზროვნების განვითარება სკოლებში“.
უწყების ინფორმაციით, საჯარო სკოლისა და პროფესიული საგანმანათლებლო კოლეჯის მასწავლებლებს ტრენინგები ჩაუტარდათ თემებზე: კრიტიკული აზროვნება, დეზინფორმაციის იდენტიფიცირების სხვადასხვა ხერხი და ინფორმაციის დადასტურების მეთოდები.
პედაგოგების გადამზადება თბილისსა და საქართველოს ყველა რეგიონში მიმდინარეობს, მათ შორის – ეთნიკური უმცირესობებით მჭიდროდ დასახლებულ რეგიონებში.
სერტიფიცირებული ტრენინგის მიზანია – პედაგოგებმა კრიტიკული და ლოგიკური აზროვნების უნარები განივითარონ და მიღებული ცოდნა მოსწავლეებს გაუზიარონ.
პროექტი ევროკავშირის დაფინანსებითა და საქართველოს განათლებისა და მეცნიერების სამინისტროს მხარდაჭერით ხორციელდება.