თბილისი, 11 აგვისტო – Sputnik. საქართველოში ბოლო 24 საათში ვაქცინაციის რეკორდი დაფიქსირდა - კორონავირუსის საწინააღმდეგო აცრა 23.935-მა ადამიანმა გაიკეთა, ნათქვამია დაავადებათა კონტროლის და საზოგადოებრივი ჯანმრთელობის ცენტრის განცხადებაში.
ცენტრის მონაცემებით, ქვეყანაში ჯამში 688.940 აცრა ჩატარდა, აქედან სრულად (ორჯერადად) ვაქცინირებულია 210.776 ადამიანი.
საქართველოში მასობრივი ვაქცინაცია 5 ივლისს დაიწყო. მანამდე პირველ ეტაპზე იცრებოდა მედპერსონალი, მაგრამ დაბალი მიმართვიანობის გამო იმუნიზაციის პროგრამა გაფართოვდა. ეპიდემიოლოგების განმარტებით, ვირუსის დასამარცხებლად აუცილებელია ქვეყნის მოსახლეობის 60–70% იყოს ვაქცინირებული.
ქვეყანა კორონავირუსის მეოთხე ტალღას ებრძვის. ინფიცირების შემთხვევების ყოველდღიური მაჩვენებელი ძალზე მაღალია. ყველაზე მძიმე საქართველოში კორონავირუსის მეორე ტალღა იყო 2020 წლის შემოდგომაზე. მაშინ ინფიცირების ყოველდღიური მაჩვენებელი 4–5 ათასი იყო. ამჟამად ინფიცირების ყოველდღიურმა მაჩვენებელმა უკვე გადააჭარბა მეორე ტალღის დროს არსებულ მონაცემებს.
ამ დროისათვის ქვეყანაში პრეპარატ Pfizer-ით 16 წლიდან პირთა ვაქცინაცია მიმდინარეობს. რაც შეეხება 18 წლის და ზემოთ ასაკის პირებს, მათ არჩევანის გაკეთება შეუძლიათ პრეპარატ Pfizer-ს, Sinopharm-სა და Sinovac-ს შორის. AstraZeneca-ს არჩევა 45 წელს ზემოთ პირებს შეუძლიათ.