ვის დაუჭერს მხარს ამომრჩეველი ადგილობრივ არჩევნებზე – გამოკითხვის შედეგები

თბილისი, 2 აგვისტო — Sputnik. მმართველი პარტია „ქართული ოცნება – დემოკრატიული საქართველო“ ქვეყანაში არსებულ პარტიებს შორის ლიდერია, აშშ-ის საერთაშორისო რესპუბლიკური ინსტიტუტის (IRI) კვლევის შედეგებით, მას რესპონდენტების 28% უჭერს მხარს. 

IRI–მ კვლევა საქართველოს ათ რეგიონში 15–30 ივნისის პერიოდში ჩაატარა, რომლის ფარგლებშიც 1,5 ათასი მოქალაქე გამოიკითხა.

კითხვაზე, „ოქტომბრის ადგილობრივი არჩევნები რომ მომდევნო კვირას ტარდებოდეს, რომელ პარტიას მისცემდით ხმას“, რესპონდენტების აზრი შემდეგნაირად გადანაწილდა:

– „ქართული ოცნება – დემოკრატიული საქართველო“ – 28%

– „ერთიანი ნაციონალური მოძრაობა“ – გაერთიანებული ოპოზიცია „ძალა ერთობაშია“ – 15%

– „საქართველოსთვის“ – გიორგი გახარია – 9%.

– „ლეიბორისტული პარტია“ – შალვა ნათელაშვილი – 3%

– „გირჩი – მეტი თავისუფლება“ – ზურაბ ჯაფარიძე – 3%

– „სტრატეგია აღმაშენებელი“ – გიორგი ვაშაძე – 2%

– „ლელო საქართველოსთვის“ – მამუკა ხაზარაძე/ბადრი ჯაფარიძე – 2%

– „პატრიოტთა ალიანსი“ – 2%

– „მოქალაქეები“ – ალეკო ელისაშვილი – 2%

– „ერთობა, რაობა, იმედი“ – ლევან ვასაძე – 2%

– „ევროპული საქართველო – მოძრაობა თავისუფლებისთვის“ – 1%

– „ხალხისთვის“ – ანა დოლიძე – 1%

– „გირჩი“ – 1%

– სხვა პარტიები – 1%.

ამავე კვლევის თანახმად, კითხვაზე, „რომელ პარტიას არ მისცემდით არასდროს ხმას არავითარ შემთხვევაში“ გამოკითხულთა პასუხები პარტიების მიხედვით ასე გადანაწილდა:

– „ერთიანი ნაციონალური მოძრაობა“ – გაერთიანებული ოპოზიცია „ძალა ერთობაშია“ – 30%

– „ქართული ოცნება – დემოკრატიული საქართველო“ – 24%

– „გირჩი“ – 10%

– „პატრიოტთა ალიანსი“ – 10%

– „გირჩი – მეტი თავისუფლება“ – ზურაბ ჯაფარიძე – 8%

– „ლეიბორისტული პარტია“ – შალვა ნათელაშვილი – 7%

– „ერთიანი საქართველო“ – ნინო ბურჯანაძე – 5%

– „მოქალაქეები“ – ალეკო ელისაშვილი – 4%

– „სტრატეგია აღმაშენებელი“ – გიორგი ვაშაძე – 4%

– „საქართველოსთვის“ – გიორგი გახარია – 3%

– „ევროპული საქართველო – მოძრაობა თავისუფლებისთვის“ – გიგა ბოკერია – 3%

– „ლელო საქართველოსთვის“ – მამუკა ხაზარაძე/ბადრი ჯაფარიძე – 3%.

კითხვაზე, მხარს უჭერენ თუ არა ოპოზიციის მოთხოვნას საქართველოში ვადამდელი არჩევნების გამართვის შესახებ, გამოკითხულთა 29%-მა დადებითი პასუხი გასცა. 22% მეტ-ნაკლებად ეთანხმება, 12% მეტ-ნაკლებად არ იზიარებს ამ მოთხოვნას, 27% კატეგორიულად არ იზიარებს, 10%-ს კი პასუხი არ აქვს.

კითხვაზე, იქნება თუ არა დაგეგმილი არჩევნები თავისუფალი და სამართლიანი, რესპონდენტების 14% მიიჩნევს, რომ იგი თავისუფალ და სამართლიან გარემოში ჩატარდება. 38% ფიქრობს, რომ იგი „შეიძლება იყოს“ თავისუფალი და სამართლიანი, 25% ფიქრობს, რომ არჩევნები „შეიძლება არ იყოს“ თავისუფალი და სამართლიანი, 13% კი აცხადებს, რომ არჩევნები ნამდვილად არ იქნება სამართლიანი, გამოკითხულთა 9%-ს კი პასუხი არ აქვს.

საქართველოში ადგილობრივი თვითმმართველობის არჩევნები 2021 წლის 2 ოქტომბერს არის დაგეგმილი.