თბილისი, 2 აგვისტო – Sputnik. გამოქვეყნდა ქართულ ენასა და ლიტერატურაში ერთიანი ეროვნული გამოცდების პირველადი შედეგები, ნათქვამია შეფასების და გამოცდების ეროვნული ცენტრის მიერ გამოქვეყნებულ განცხადებაში.
უწყების ინფორმაციით, გამოცდების შედეგების გაგება როგორც ვებ-გვერდის, ასევე მოკლე ტექსტური შეტყობინების საშუალებითაც არის შესაძლებელი. ამისათვის აპლიკანტმა მობილური ტელეფონიდან საკუთარი საგამოცდო საიდენტიფიკაციო ნომერი უნდა გაგზავნოს ნომერზე 93333, რომლის საფასურიც 50 თეთრია.
გამოცდების ეროვნულიც ცენტრის ცნობით, პირად გვერდზე გამოსაცდელს ექნება საკუთარი ნაშრომის ასლისა და კონკრეტულ საგანში მიღებული პირველადი, ე.წ. ნედლი ქულის ნახვის შესაძლებლობა. ერთიანი ეროვნული გამოცდების საბოლოო შედეგები კი გამოქვეყნდება საპრეტენზიო განაცხადების განხილვის, ქულების გათანაბრებისა და სკალირების შემდეგ.
ქართული ენისა და ლიტერატურის ტესტის მაქსიმალური ქულაა 70. აბიტურიენტს ეს საგანი ჩაბარებულად ჩაეთვლება, თუ ქულათა გათანაბრების შემდეგ მისი ქულა გახდება ამ საგნისათვის განსაზღვრული მაქსიმალური ქულის 25%-ზე მეტი (17,5 ქულაზე მეტი).
სააპელაციო განაცხადების მიღება ყველა საგნის პირველადი შედეგის გამოქვეყნების შემდეგ დაიწყება. განაცხადები მიიღება მხოლოდ ელექტრონულად.
დამატებითი საგამოცდო სესიები დღეს, 2 აგვისტოს სრულდება. დამატებითი სესიები დაინიშნა იმ აბიტურიენტებისათვის, რომლებმაც COVID-19-ის დადასტურების გამო ვერ შეძლეს გამოცდაზე გასვლა. დამატებითი სესიები ჩატარდა ქართულ ენასა და ლიტერატურაში, მათემატიკაში, უცხოურ ენებში, ქიმიაში, ფიზიკაში, ზოგად უნარებში, გეოგრაფიაში, სახვით და გამოყენებით ხელოვნებაში, ბიოლოგიასა და ლიტერატურაში.
უწყების ინფორმაციით, სარეგისტრაციო განაცხადში საგანმანათლებლო პროგრამების მითითებისა და შეცვლის საშუალება აბიტურიენტებს აპელაციების შედეგების გამოქვეყნებიდან მომდევნო დღის ჩათვლით ექნებათ.
ერთიანი ეროვნული გამოცდები 1 ივლისს ქართული ენისა და ლიტერატურის გამოცდით დაიწყო. 2021 წელს ერთიანი ეროვნული გამოცდებისთვის რეგისტრაცია 38.400-ზე მეტმა აბიტურიენტმა გაიარა.