თბილისი, 28 ივლისი – Sputnik. საქართველოს თავდაცვის ძალების აღმოსავლეთ სარდლობაში სამხედრო მოსამსახურეების ვაქცინაციის პროცესი აქტიურ ფაზაშია. მეხუთე საარტილერიო ბრიგადაში ვაქცინაციის კაბინეტი გაიხსნა.
ვაქცინაცია ასევე ტარდება გორის გიორგი აბრამიშვილის სახელობის სამხედრო ჰოსპიტალში და ქუთაისის თავდაცვის სამინისტროს სამედიცინო ცენტრში.
რთული ეპიდემიოლოგიური ვითარების გათვალისწინებით თავდაცვის სამინისტრო ვაქცინაციის დამატებითი პუნქტების გახსნას გეგმავს. სურვილის შემთხვევაში სამინისტრო სამხედრო მოსამსახურეების ოჯახის წევრების ვაქცინაციასაც უზრუნველყოფს.
გუშინდელი მონაცემებით, კორონავირუსის 3.666 ახალი შემთხვევა გამოვლინდა და ინფიცირებულების საერთო რიცხვმა 407.698-ს მიაღწია. ქვეყანაში ვაქცინის ორივე დოზით 142.254 მოქალაქეა აცრილი.