თავიდან წყალი სვანიძის ქუჩაზე და მის ქვემოთ განთავსებულ ცხოველთა თავშესაფარში მოვარდა, დაიტბორა და დაინგრა საცხოვრებელი სახლები, შემდეგ ხეობაში სადინარს გაჰყვა და გაანადგურა ქალაქის ინფრასტრუქტურა, გზიდან გადაყარა ტრანსპორტი.
ავტომობილებიდან თავის დაღწევა ყველამ ვერ შეძლო, მათგან ნაწილი დაიღუპა. წყალმა დააზიანა პარკი „მზიური“ და ქალაქის ზოოპარკის ტერიტორიაც დატბორა. დაიხოცა უამრავი ცხოველი, მათმა ნაწილმა ვოლიერიდან თავის დაღწევა შეძლო და ქალაქში აღმოჩნდა.
საბოლოოდ მეწყერმა გმირთა მოედნამდე მიაღწია, სადაც დაზიანდა ქალაქის ინფრასტრუქტურა, სახლები, გზები, ხიდები, საკომუნიკაციო სისტემები.
წყალდიდობის შედეგად 200-ზე მეტი ოჯახი დაზარალდა. დაიღუპა 21 ადამიანი, ხოლო ორი კვლავ უგზო-უკვლოდ დაკარგულად მიიჩნევა.