თბილისი, 18 მაისი – Sputnik. 2020 წლის შემოდგომაზე ჩატარებული საპარლამენტო არჩევნების შემსწავლელმა დროებითმა საგამოძიებო კომისიამ მიიღო გადაწყვეტილება, რომ ამომრჩევლების ხმები ხელმეორედ პირდაპირ ეთერში გადაითვალონ. ამის შესახებ საგამოძიებო კომისიის ხელმძღვანელმა გივი მიქანაძემ სხდომაზე განაცხადა.
როგორც მიქანაძემ აღნიშნა, ხმების დათვლის პროცესი სპეციალურ უნარებსა და გამოცდილებას მოითხოვს, ამიტომ ამისთვის 12 ადამიანს დაიქირავებენ.
„ეს ადამიანები განახორციელებენ გადათვლას, მაგრამ ჩვენ ვიქნებით დამსწრე, ზედამხედველი და იმის მაკონტროლებელი, რომ ეს პროცესი სწორად მიმდინარეობს. საჯაროობა და ღიაობა უზრუნველყოფილი რომ იყოს, მნიშვნელოვანი იქნება, პროცესი ლაივსტრიმით, პირდაპირ ეთერში გადაიცეს“, – აღნიშნა მიქანაძემ.
საგამოძიებო კომისია ქვეყნის საკანონმდებლო ორგანოში 17 თებერვალს შეიქმნა. ამის ინიციატორი მმართველი პარტია „ქართული ოცნება“ იყო. მან ეს გადაწყვეტილება ოპოზიციის პრალდებების საპასუხოდ მიიღო, რომელიც „ოცნებას“ არჩევნების გაყალბებაში ადანაშაულებს.
მმართველმა პარტიამ პირობა დადო, რომ კომისია გადაითვლის ხმებს უბნების ნაწილში და თუ შედეგები 1%-ზე მეტით არ დაემთხვევა საქართველოს ცესკოს შედეგებს, ქვეყანაში ახალი საპარლამენტო არჩევნები დაინიშნება.
არჩევნების შედეგებით მმართველმა პარტიამ პარლამენტში 90 ადგილი მიიღო, დანარჩენი 60 ადგილი რვა ოპოზიციურ პარტიას შორის გადანაწილდა.
არჩევნების შედეგებით 36 მანდატი მიიღო „ერთიანმა ნაციონალურმა მოძრაობამ“, მაგრამ პარტიას გადაწყვეტილება პარლამენტში შესვლაზე ჯერ არ მიუღია.
„ნაციონალებთან“ ერთად პარლამენტს ბოიკოტს უცხადებენ „ევროპული საქართველოს“ წევრებიც. პარტია თავის დროზე სააკაშვილის ყოფილმა თანამოაზრეებმა ჩამოაყალიბეს. ბოიკოტის რეჟიმშია „ლეიბორისტული პარტიაც.