თბილისი, 13 მაისი – Sputnik. ქართველი სუმოისტი ლევან გორგაძე იგივე ტოჩინოშინი ტოკიოში მიმდინარე სუპერტურნირზე კიდევ ერთხელ დამარცხდა.
აღმოსავლეთის მე-7 მაეგაშირა ტოჩინოშინი მაისის ბაშოს მეხუთე დღეს დასავლეთის მე-5 მაეგაშირა ონოშოს შეხვდა და ჰიკიოტოშის ილეთით წააგო. სასტარტო შეჯახების შემდეგ 33 წლის ქართველმა სუმოისტმა წონასწორობა დაკარგა და დოჰიოზე დაეცა.
ლევან გორგაძესთვის ეს მიმდინარე ბაშოზე მეოთხე მარცხია, მის ანგარიშზე კი მხოლოდ ერთი გამარჯვებაა.
ტოჩინოშინის მორიგი მეტოქე დასავლეთის მე-9 მაეგაშირა კაგაიაკი იქნება, რომელსაც ნაცუ ბაშოზე ორი გამარჯვება აქვს. ქართველი სუმოისტი 26 წლის მეტოქეს მეშვიდედ შეხვდება. ურთიერთშეხვედრებში ქართველს კაგაიაკისთან დიდი უპირატესობა აქვს, ლევანის ანგარიშზე ექვსიდან ხუთი გამარჯვებაა.