თბილისი, 10 მაისი – Sputnik. საქართველოს პრემიერ-მინისტრის ირაკლი ღარიბაშვილის ოფიციალური ვიზიტი სომხეთში 12 მაისს გაიმართება, იუწყება „Sputnik-სომხეთი“.
სომხეთის საგარეო საქმეთა მინისტრის მოვალეობის შემსრულებელსა და სამინისტროს პროტოკოლის სამსახურს ვიზიტის მომზადება დაევალა. თავდაცვის სამინისტრო უზრუნველყოფს საპატიო ყარაულის ასეულს პროტოკოლით გათვალისწინებულ ღონისძიებებზე, ხოლო სამართალდამცველი ორგანოები – დელეგაციის წევრების უსაფრთხოებას.
ვიზიტის პროგრამა ჯერჯერობით არ არის გასაჯაროებული.
ღარიბაშვილი სომხეთს უკვე ორჯერ ესტუმრა: საქართველოს პრემიერის თანამდებობაზე ყოფნისას 2014 წელს და 2020 წელს - თავდაცვის მინისტრობისას. ორივე ვიზიტისას პოლიტიკოსმა განაცხადა, რომ თანამშრომლობის ყველა სფეროში ორმხრივი ურთიერთობების გაღრმავებას აპირებს.
პრემიერის სტატუსით 2019 წელს სომხეთში ოფიციალური ვიზიტით საქართველოს პრემიერ-მინისტრი გიორგი გახარია იმყოფებოდა.