ტელეწამყვანმა მაია ასათიანმა დაბადების დღის აღნიშვნა სახლში, მეგობრების გარემოცვაში გადაწყვიტა. მიუხედავად იმისა, რომ საკუთარ იუბილეზე ტელეწამყვანი მანამდე შეკვეთილში, სასტუმრო „პრაგრაფში“ საყვარელ ადამიანთან ერთად იმყოფებოდა, არც მეგობრები დაივიწყა.
მის დაბადების დღეზე ცნობილი ადამიანები და კოლეგები შეკრიბნენ. მათ შორის თოქშოუ „პროფილის“ შემოქმედებითი გუნდი, მოდელი და მსახიობი შორენა ბეგაშვილი, მომღერალი ნოდიკო ტატიშვილი, მოცეკვავე ოთო ფოლადაშვილი, რომელმაც ტელეწამყვანს ულამაზესი თაიგული მიართვა. „ყველაზე მაგარი ბიჭის ყველაზე მაგარი საჩუქარი“, – ასეთი რეაქცია ჰქონდა მაია ასათიანს საჩუქრის მიღებისას.
რაც შეეხება ტელეწამყვანის საყვარელ მამაკაცს, ჯერჯერობით ასათიანი საზოგადოებას მის ვინაობას უმალავს და ამჯობინებს, რომ პირადი ცხოვრების დეტალები გასაიდუმლოებული ჰქონდეს. მასთან ერთად გადაღებულ მხოლოდ ისეთ ფოტოებს აქვეყნებს, სადაც სახე არ ჩანს.
მაია ასათიანი რომ შეყვარებულია, ამას რამდენიმე თვის წინ „ფორტუნა პლუსის“ გადაცემა „ვიზიტორში“ გაკეთებული განცხადებაც მოწმობს. მაშინ ტელეწამყვანმა თქვა, რომ რასაც მის პირად ცხოვრებაზე საუბრობდნენ, მართალი იყო, უბრალოდ ამაზე საჯაროდ საუბარი არ სურს, რადგან ეს პირადი ცხოვრება მხოლოდ მისი არ არის.
„მე პირადი ცხოვრება მაქვს და მუდამ მქონდა, უბრალოდ ის დაცულია. რაც გათხოვებას შეეხება, გათხოვება არ მინდა“, – თქვა მაშინ ტელეწამყვანმა.