თბილისი, 10 მაისი – Sputnik. 2021 წლის პირველ კვარტალში საქართველოს გზებზე ავტოსაგზაო შემთხვევების შედეგად 94 ადამიანი გარდაიცვალა, ხოლო 1,6 ათასი დაშავდა, ნათქვამია შინაგან საქმეთა სამინისტროს ვებ-გვერდზე გავრცელებულ განცხადებაში.
უწყების ცნობით, მიმდინარე წლის 1 იანვრიდან 31 მარტამდე პერიოდში 1.247 ავარია მოხდა. შემთხვევების 43% თბილისზე მოდის.
თბილისში მომხდარი 539 ავარიის შედეგად დაიღუპა 13 და დაშავდა 645 ადამიანი.
რაც შეეხება რეგიონებს, ყველაზე მეტი ავტოსაგზაო შემთხვევა მოხდა კახეთში, იმერეთში, რაჭა-ლეჩხუმსა და ქვემო სვანეთში.
რეგიონების მიხედვით ვითარება ასეთია:
| რეგიონი | ავარიების რაოდენობა | დაღუპულთა რაოდენობა | დაშავებულთა რაოდენობა |
| აჭარა | 89 | 6 | 115 |
| სამეგრელო–ზემო სვანეთი | 80 | 11 | 107 |
| იმერეთი, რაჭა-ლეჩხუმი და ქვემო სვანეთი | 159 | 22 | 212 |
| შიდა ქართლი | 89 | 9 | 134 |
| ქვემო ქართლი | 98 | 7 | 129 |
| კახეთი | 103 | 11 | 146 |
| სამცხე-ჯავახეთი | 35 | 3 | 47 |
| მცხეთა-მთიანეთი | 26 | 8 | 34 |
| გურია | 29 | 4 | 44 |
ავტოსაგზაო შემთხვევების მიზეზები და სახეობები
2021 წლის 1 იანვრიდან 31 მარტამდე პერიოდში ავარიების ყველაზე გავრცელებული ტიპი მოძრავი სატრანსპორტო საშუალებების მონაწილეობით მომხდარი შემთხვევებია – 606 შემთხვევის შედეგად დაიღუპა 17 და დაშავდა 857 ადამიანი.
ავტოავარიების მიზეზებს შორის მეორე ადგილზეა ქვეითზე შეჯახება – მიმდინარე წლის პირველ კვარტალში 212 მსგავსი ფაქტი მოხდა, გარდაიცვალა 16 და დაშავდა 213 ადამიანი.
ავტოავარიების მიზეზებს შორის მესამე ადგილზეა შეჯახება დაბრკოლებაზე – მიმდინარე წლის პირველ კვარტალში 66 მსგავსი შემთხვევის შედეგად დაიღუპა 7 ადამიანი, 90 კი კლინიკებში მოხვდა.
გარდა ამისა, აღნიშნულ პერიოდში 6 ავარია ველოსიპედისტის, 35 კი მოტოციკლეტისტის მონაწილეობით მოხდა – დაიღუპა 3 და დაშავდა 38 ადამიანი.
რაც შეეხება ავარიების მიზეზებს, ავარიების დიდი ნაწილი მოხდა გასწრების წესების დარღვევის, სიჩქარის გადაჭარბებისა და ქვეითთა გადასასვლელის გავლის წესების დარღვევის შედეგად.