თბილისი, 5 მაისი — Sputnik. საქართველოს შინაგან საქმეთა მინისტრს ვახტანგ გომელაურს მმართველი პარტიის მიერ მომზადებული ამნისტიის შესახებ კანონპროექტი სამართლიანად მიაჩნია.
როგორც მინისტრმა ჟურნალისტებთან საუბრისას განაცხადა, მისი აზრით, 2019 წლის 20-21 ივნისის მოვლენებთან დაკავშირებით ამნისტია პოლიციელებსაც უნდა შეეხოს. აღნიშნულ საქმეზე ყველაზე მძიმე ბრალდება ოპოზიციური პარტია „ერთიანი ნაციონალური მოძრაობის“ ლიდერს ნიკა მელიას აქვს წაყენებული, დასძინა გომელაურმა.
2019 წლის 20-21 ივნისის „გავრილოვის ღამედ“ წოდებული პროტესტის შემდეგ აღძრული საქმეების ფიგურანტების ამნისტია ევროკავშირის შუამავლობით მხარეების მიერ ხელმოწერილი შეთანხმების ერთ-ერთი პუნქტია.
გომელაურის თქმით, ამნისტია პოლიტიკური გადაწყვეტილებაა და თუ იგი გამოცხადდება, ის პოლიციელებსაც უნდა შეეხოს.
„მე პოლიციელებს ვიცავ არა როგორც შინაგან საქმეთა მინისტრი. ნიკა მელიას ყველაზე მძიმე მუხლი აქვს წაყენებული და თუ ამნისტია მელიას უნდა შეეხოს, რატომ არ უნდა შეეხოს იგი გაცილებით მსუბუქ მუხლებს? ეს ხომ უსამართლობა იქნება?! მძიმე მუხლებს იგი (ამნისტია) ისეც არ ეხება. ამიტომაც ვთვლი, რომ კანონპროექტი სამართლიანია“, – განაცხადა გომელაურმა.
მინისტრის თქმით, ამნისტია არ შეეხება იმ პირებს, რომლებიც სსკ-ის 117-ე „ჯანმრთელობის განზრახ მძიმე დაზიანების“ მუხლით გადიან.
საქართველოს პარლამენტში „მაისის არდადეგების“ შემდეგ ამნისტიის შესახებ კანონპროექტის ორი ვარიანტი დარეგისტრირდება – ერთი უმრავლესობის, მეორე ოპოზიციის მიერ მომზადებული.
მმართველი პარტიისა და ოპოზიციის მიერ მომზადებული დოკუმენტების ვერსიები განსხვავდება ერთმანეთისგან – მხარეებს თავად ამნისტიის პროცესთან დაკავშირებით განსხვავებული ხედვა აქვთ. ხელისუფლების სურვილია, რომ ამნისტია საქმის ყველა ფიგურანტს შეეხოს, მათ შორის პოლიციელებსაც და იმ შესაძლო პირებსაც, რომლებიც შეიძლება გამოძიებამ მოგვიანებით გამოავლინოს.
ოპოზიცია, პირველ რიგში, ჯგუფური ძალადობის ორგანიზებასა და მასში მონაწილეობისთვის ბრალდებულთა და გასამართლებულთა ამნისტიისა და მათთვის ნასამართლობის მოხსნის წინადადებით გამოდის. ასეთ ბრალდებულთა შორის, რიგითი აქტივისტების გარდა, არის „ერთიანი ნაციონალური მოძრაობის“ თავმჯდომარე ნიკა მელია, რომელიც ამჟამად პატიმრობაშია.
გარდა ამისა, ოპოზიცია 20–21 ივნისის ღამეს სამსახურებრივი უფლებამოსილების გადამეტებაში ამჟამად ბრალდებული პოლიციელების ამნისტიაზეც თანახმაა, მაგრამ ამავდროულად იმ პირთა პასუხისმგებლობისგან გათავისუფლების წინააღმდეგია, რომლებსაც პოლიტიკური თანამდებობები ეკავათ და მონაწილეობდნენ ბრძანებების გაცემაში.