თბილისი, 3 მაისი - Sputnik. დათანხმდება თუ არა „ნაციონალური მოძრაობის“ თავმჯდომარე ნიკა მელია ევროკავშირის მიერ მისთვის დაკისრებული გირაოს გადახდის წინადადებას, ხვალ გახდება ცნობილი, იუწყება ტელეკომპანია „იმედი“.
გავრცელებული ინფორმაციით, მელიას საბოლოო გადაწყვეტილების შესახებ, რუსთავის ციხეში თავის ადვოკატებთან შეხვედრის შემდეგ გახდება ცნობილი.
„[მელია] პრინციპულად და პოლიტიკურად გადადგამს ისეთ ნაბიჯს, რომელიც სწორი და საჭირო იქნება ოპოზიციური ერთობისთვის. ის განიხილავს ყველა ვერსიას, რაც მის ირგვლივ არის. ის აფასებს ევროკავშირის მიერ გადადგმულ ნაბიჯს და გაკეთებულ შეთავაზებას“, — განაცხადა პარტია „ნაციონალური მოძრაობის“ წევრმა გიორგი ხვედელიანმა.
ნიკა მელია მიმდინარე წლის 23 თებერვალს ენმ−ის ცენტრალურ ოფისში დააკავეს. 17 თებერვალს თბილისის საქალაქო სასამართლომ მას 2019 წლის 20–21 ივნისის საქმესთან დაკავშირებით დაუსწრებლად შეუფარდა პატიმრობა. ეს მას შემდეგ მოხდა, რაც მელიამ უარი განაცხადა გირაოს გადახდაზე, რომელიც მას აღკვეთის ალტერნატიულ ღონისძიებად შეეფარდა. მანამდე, პროკურატურის მოთხოვნით, პარლამენტმა მელიას სადეპუტატო იმუნიტეტი მოუხსნა, თუმცა ის კვლავ არის პარლამენტის წევრი.
გათავისუფლების გარანტიების მიუხედავად, „ერთიანი ნაციონალური მოძრაობა“ უარს აცხადებს შეთანხმების ხელმოწერაზე და პარლამენტში შესვლაზე მანამ, სანამ ნიკა მელია საპატიმროდან არ გამოვა.