ცნობილი ქართველი მოდელი ალექსანდრა პაიჭაძე გადაცემა „სთორიში“ წლების წინ მომხდარ ისტორიას იხსენებს, როდესაც სერიალ „ჰეროკრატიაში“ თამაშობდა. ამბობს, რომ მაშინ რეჟისორმა გოგა ხაინდრავამ მოატყუა და ახლა ნანობს, რომ რეჟისორის წინააღმდეგ სამართლებრივ ხერხებს არ მიმართა.
„რამდენი ხანია მე ამ თემაზე არ მისაუბრია. მაშინ გოგა ხაინდრავამ დაარღვია ყველა შეთანხმება, რაც მე მქონდა მასთან. უბრალოდ, კაცური სიტყვაც კი გატეხა, როდესაც მითხრა - შენ, როგორც ჰოლივუდელი მსახიობი, ისე მოიქეცი, იარე შიშველმა ოთახშიო და მე სულელმა, გამოუცდელმა მსახიობმა დავუჯერე მას. მივენდე, როგორც კაცის და რეჟისორის სიტყვას, რომ არ ჩასვამდა სერიალში ჩემს მკერდმოშიშვლებულ კადრებს. თუმცა გამოვიდა სერიალი და ვნახე, რომ ჩემი მკერდმოშიშვლებული კადრები წერდა ძალიან კარგ რეიტინგს“, – აცხადებს მოდელი.
მისი თქმით, ეს იყო მისი პირველი შიშვლად გამოჩენა ეკრანზე, რომელიც სულაც არ სურდა და მაშინ იმდენად გული დასწყდა ამ ყველაფერზე, ახლა ნანობს, რომ რაიმე სამართლებრივ ხერხს არ მიმართა.
„ეთქვა და ცოტა სხვა ჰონორარს მოვითხოვდი, იქნებ არ ვიყავი წინააღმდეგი, უბრალოდ ვერ ვიტან, როცა არაკაცურად გატყუებენ“, – აღნიშნა ალექსანდრა პაიჭაძემ.