ქართველი დიზაინერის ანუკი არეშიძის სამოსს მსოფლიოს არაერთი ცნობილი ადამიანი ირგებს. ილონ მასკის დედის, მაია მასკის შემდეგ ანუკის სამოსში საზოგადოების წინაშე ახლა ჯასტინ ბიბერის მეუღლე ჰეილი ბიბერი გამოჩნდა.
ჰეილი ბიბერმა, რომელსაც უამრავი თინეიჯერი გოგონა ბაძავს, ანუკის ვეგანური ტყავის ორეული მოირგო. მსოფლიო ვარსკვლავის მეუღლე ანუკის სამოსში 26 მარტს ლოს-ანჯელესში დააფიქსირეს.
აღსანიშნავია, რომ ანუკი არეშიძე უკვე წლებია წარმატებით ავითარებს საკუთარ ბიზნესს. მისი დიზაინით შექმნილ ტანსაცმელსა და ფეხსაცმელს მსოფლიოს სხვადასხვა ქვეყანაში ირგებენ.
რამდენიმე კვირის წინ ანუკის ახალი მაღაზია დუბაიში, ერთ-ერთ ყველაზე ცნობილ საშოპინგო სივრცეში, „ლაფაიეტში“ გაიხსნა. ფოტოები სოციალურ ქსელში თავად არეშიძემ გაავრცელა და უამრავი მილოცვაც მიიღო.