თბილისი, 4 მარტი – Sputnik. საქართველოს კორონავირუსის საწინააღმდეგო ვაქცინის მიღების ყველაზე დიდი შანსი ინდოეთიდან აქვს, თუმცა მოლაპარაკებები მიდის ჩინეთთან და დასავლეთთანაც, განაცხადა საქართველოს დაავადებათა კონტროლის ეროვნული ცენტრის ხელმძღვანელის მოადგილემ პაატა იმნაძემ.
„ჯანმოს მიერ აღიარებული ვაქცინების ერთ-ერთი ყველაზე დიდი მწარმოებელი არის ინდოეთი, საიდანაც ახლა ყველაზე მეტი შანსია ვაქცინების მიღების. ასევე მიდის გარკვეული მოლაპარაკებები ჩინურ მხარესთანაც და დასავლელ პარტნიორებთანაც. იყო დაპირებები, მაგრამ, სამწუხაროდ, თავად ევროპის ქვეყნები ვერ ახერხებენ საკმარისი რაოდენობის ვაქცინების მიღებას, რომ ჩვენც გვიწილადონ“, – განაცხადა იმნაძემ.
მისი თქმით, მსოფლიო ბაზარზე ვაქცინების დეფიციტია, მწარმოებლებმა კი ვერ შეძლეს წარმოების ისე გაფართოება, რომ მოთხოვნა დაკმაყოფილებულიყო. ერთადერთი ქვეყანა, რომელსაც მოსახლეობის ვაქცინაციის მხრივ მაღალი მაჩვენებელი აქვს, ისრაელია (30%), შემდეგ მოდიან აშშ (20%) და ევროკავშირი (7%).
COVAX–პლატფორმამ ვაქცინებით პირველ რიგში იმ ქვეყნების მომარაგება დაიწყო, რომლებიც დონორთა დახმარებაზე არიან დამოკიდებული. ისინი ვაქცინას ძალიან შეღავათიან ფასებში იღებენ, განსხვავებით იმ ქვეყნებისგან, რომლებიც თვითდაფინანსებით არიან და ვაქცინაში ფულს იხდიან. ამ ქვეყნების ჩამონათვალში შედის საქართველოც.
ადრე საქართველოს ჯანდაცვის მინისტრის მოადგილემ თამარ გაბუნიამ განაცხადა, რომ COVAX–პლატფორმამ საქართველოს ჩათვლით 18 ქვეყანა განსაზღვრა, რომლებიც Pfizer-ის ვაქცინას გამონაკლისის სახით მიიღებენ.
გაბუნიას თქმით, Pfizer-ის ვაქცინასთან დაკავშირებით დამატებითი კონსულტაცია კვირის ბოლოს გაიმართება, რის შემდეგაც შესაძლებელი გახდება ქვეყანაში ვაქცინის შემოტანის სავარაუდო ვადების განსაზღვრა.
საუბარი ასევე მიდის ქვეყანაში კიდევ ერთი, ამერიკული წარმოების Novavax-ის ვაქცინის შემოტანაზე. თბილისის ინფექციური საავადმყოფოს დირექტორის თენგიზ ცერცვაძის განცხადებით, ქვეყანა ივნისში 1 მლნ დოზა ამერიკულ ვაქცინას მიიღებს. Novavax ითვალისწინებს ორ აცრას, ისევე, როგორც AstraZeneca და Pfizer.
რაც შეეხება AstraZeneca-ს ვაქცინას, საქართველო ამ ვაქცინის მიღებას მაისის ბოლომდე ვარაუდობს.