თბილისი, 25 თებერვალი – Sputnik. ისრაელში საქართველოს საელჩო ქვეყანაში მცხოვრები თანამემამულეებისთვის ინფორმაციას ავრცელებს.
უწყების ცნობით, ისრაელის მთავრობის გადაწყვეტილებით, პურიმის დღესასწაულთან დაკავშირებით ქვეყანაში შეზღუდვები ამოქმედდება.
„პურიმის დღესასწაულზე – 25 თებერვლის საღამოდან 28 თებერვლამდე 20:30-05:00 საათებში ქვეყანაში კომენდანტის საათი იმოქმედებს. იკრძალება: საცხოვრებელი სახლიდან ერთი კილომეტრის მანძილზე დაშორება; სხვასთან სტუმრობა. საზოგადოებრივი ტრანსპორტი მუშაობას 20:00 საათზე შეწყვეტს“, – ნათქვამია საელჩოს მიერ გავრცელებულ ინფორმაციაში.
ისრაელში 21 თებერვლიდან მოიხსნა კოვიდ-შეზღუდვები, მაგრამ ეს შეეხო მხოლოდ აცრილ ან კოვიდგადატანილ მოქალაქეებს.
„მწვანე პასპორტების“ მფლობელებისთვის გაიხსნება სატრენაჟორო დარბაზები, აუზები, ფიტნეს-კლუბები, სასტუმროები (რესტორნების გარეშე), კულტურული ობიექტები. იგივე დოკუმენტი იქნება საჭირო მკვდარი ზღვის კურორტებზე დასასვენებლად.
„ისრაელი მსოფლიოში პირველი ქვეყანაა, რომელსაც მოსახლეობაში ვაქცინაციის პოპულარიზაციის მიზნით „მწვანე პასპორტი“ შემოაქვს, – განაცხადა ისრაელის ტურიზმის სამინისტროს დეპარტამენტის დირექტორმა ვლადიმირ შკლიარმა. – მის (ვაქცინაციის - რედ.) ტემპებზე იქნება დამოკიდებული, რამდენად სწრაფად შევძლებთ მთელი მსოფლიოდან ტურისტების მიღებას და ამავე დროს ჩვენი მოქალაქეებისა და მოგზაურების ჯანმრთელობის გამო არ შეგვეშინდება“.
ქვეყნის ყველა მოქალაქისთვის 22 თებერვლიდან გაიხსნება მაღაზიები, სავაჭრო ცენტრები, მუზეუმები, ბიბლიოთეკები. ისინი იმუშავებენ „იისფერი სტანდარტით“, რაც გულისხმობს ფიზიკური დისტანციის დაცვას, პირბადის სავალდებულო ტარებას და მომხმარებლების შეზღუდული რაოდენობის მიღებას.