თბილისი, 17 თებერვალი - Sputnik. თბილისში ბაგები–საბურთალოს დამაკავშირებელი ხიდის მშენებლობაზე თბილისის მერიამ ტენდერი გამოაცხადა, განაცხადა დედაქალაქის მერმა კახა კალაძემ მთავრობის სხდომაზე.
გავრცელებული ინფორმაციით, ახალი ხიდი უნივერსიტეტის მე-11 კორპუსსა და ბიბლიოთეკის კორპუსს შორის გამავალ გზას ბაგებში, თბილისი–წყნეთის საავტომობილო გზასთან დააკავშირებს.
„ძალიან მნიშვნელოვანია ამ პროექტის განხორციელება, რადგან ბოლო წლების განმავლობაში ბაგები-წყნეთის მიმართულებით საავტომობილო გზა ძალიან დაიტვირთა. ახალი ხიდი შესაძლებლობას მოგვცემს ბაგებიდან საბურთალოზე გადავისროლოთ ნაკადები და ადამიანებს ჰქონდეთ გადაადგილების რამდენიმე ალტერნატივა“, - განაცხადა კახა კალაძემ.
როგორც დედაქალაქის მერმა აღნიშნა, სამუშაოების დასრულების შემდეგ ბაგებიდან საბურთალოს რაიონში მოხვედრა შესაძლებელი იქნება ვაკის გზის გვერდის ავლით, რომელიც ხშირად გადატვირთულია.