თბილისი, 9 თებერვალი – Sputnik. მოსავლის სეზონის დაწყებიდან დღემდე საქართველოდან განხორციელდა 39.0 ათასი ტონა მანდარინის ექსპორტი, რომლის ღირებულებამ 19.0 მლნ აშშ დოლარი შეადგინა, იუწყება საქართველოს გარემოს დაცვისა და სოფლის მეურნეობის სამინისტრო.
2020 წლის 1 აგვისტოდან 2021 წლის 9 თებერვლამდე პერიოდში განხორციელებული მანდარინის ექსპორტის მოცულობა 7.8 ათასი ტონით (25%), ხოლო ექსპორტის ღირებულება 2.8 მლნ აშშ დოლარით (17%) აღემატება 2019/2020 წლების ანალოგიური პერიოდის მაჩვენებლებს.
2020 წელს წარმოებული მანდარინის ექსპორტი ძირითადად განხორციელდა რუსეთის ფედერაციაში (22.5 ათასი ტონა), სომხეთსა (8.7 ათასი ტონა) და უკრაინაში (5.3 ათასი ტონა).
აღნიშნული ქვეყნების გარდა, ექსპორტი განხორციელდა აგრეთვე მოლდოვაში, თურქმენეთში, ბელარუსში, ყაზახეთში, ლიეტუვაში, სლოვენიაში, ტაჯიკეთში, ყირგიზეთში, აზერბაიჯანში, აშშ-სა და გერმანიაში.
გარემოს დაცვისა და სოფლის მეურნეობის სამინისტროს ინფორმაციით, ამ სეზონზე აჭარაში ციტრუსის მოსავალი რაოდენობით არცთუ დიდი, მაგრამ უფრო ხარისხიანი იყო.