თბილისი, 18 იანვარი – Sputnik. თურქეთის პროვინცია ბართინის სანაპიროზე ჩაძირულმა მშრალტვირთმზიდმა Arvin, რომელიც ბულგარეთში მიდიოდა, საქართველოს აკვატორია 2 იანვარს დატოვა, აცნობეს „Sputnik–საქართველოს“ ქვეყნის საზღვაო ტრანსპორტის სააგენტოს პრეს-სამსახურში.
მათი ინფორმაციით, გემის ბორტზე 12 ადამიანი იმყოფებოდა, მათ შორის საქართველოს მოქალაქე არ ყოფილა. 10 უკრაინის მოქალაქე იყო, ხოლო ორი – რუსეთის.
„გემი საქართველოს სანაპიროს თურქეთიდან 30 დეკემბერს მოადგა. უკვე 2 იანვარს ფოთის პორტი დატოვა. როგორც ჩვენთვის არის ცნობილი, ის ბულგარეთის ბურგასის პორტში მიდიოდა, ხოლო 15 იანვარს თურქეთის სანაპიროსთან რეიდზე იდგა“, – განაცხადეს პრეს-ცენტრში.
სააგენტოს ინფორმაციით, გემის ჩაძირვის მიზეზი ამინდის გაუარესება გახდა. ცნობილია, რომ გემი პალაუს დროშით ცურავდა.
ბოლო ინფორმაციით, მოხერხდა ექვსი მეზღვაურის გადარჩენა, ორი დაიღუპა. ეკიპაჟის სხვა წევრების ძებნა გრძელდება.