თბილისი, 29 დეკემბერი – Sputnik. საქართველოს პარლამენტმა „საზოგადოებრივი ჯანმრთელობის შესახებ“ საქართველოს კანონში იმ ცვლილებების მოქმედება, რომლებიც კორონავირუსის პანდემიის დროს მთავრობას საგანგებო მდგომარეობის გამოცხადების გარეშე შეზღუდვების დაწესების უფლებას ანიჭებს, 2021 წლის 30 ივნისამდე გაახანგრძლივა.
ნორმის მოქმედების გახანგრძლივებას მხარი 85-მა დეპუტატმა დაუჭირა.
ცვლილებები, რომლებიც მთავრობას ანიჭებს უფლებას – პანდემიის დროს დროებით დააწესოს შეზღუდვები და პარლამენტის თანხმობის გარეშე დაარეგულიროს საჯარო უწყებების საქმიანობის საკითხები, არის მიღებული 22 მაისს, როდესაც კორონავირუსის საფრთხის გამო საგანგებო მდგომარეობის მოქმედების ვადა იწურებოდა. მაშინ ამ უფლების ხანგრძლივობა განისაზღვრა 15 ივლისამდე ვადით. ივლისში საკანონმდებლო ორგანომ ცვლილებების მოქმედება 2021 წლის 1 იანვრამდე გაახანგრძლივა.
დღევანდელი გადაწყვეტილებით პარლამენტი ამ უფლებამოსილებას მთავრობას 2021 წლის 1 იანვრიდან 2021 წლის 30 ივნისამდე უხანგრძლივებს. კერძოდ: სიტუაციიდან და საჭიროებიდან გამომდინარე, მთავრობას აქვს უფლება შეზღუდოს მოქალაქეთა გადაადგილება, მათი შრომითი და ეკონომიკური საქმიანობა, აკრძალოს მასობრივი სოციალური ღონისძიებების გამართვა და ა.შ.
ამავე დროს მთავრობის მიერ შემოღებული შეზღუდვები უნდა შეესაბამებოდეს კონსტიტუციას და იყოს განპირობებული კანონით ან ნორმატიული აქტით. მათი შემოღება იმ შემთხვევაშია დასაშვები, თუ ისინი აუცილებელია საზოგადოებისთვის და არ ატარებს დისკრიმინაციულ ხასიათს.
შეზღუდვები უნდა იყოს პროპორციული, ხოლო მათი შემოღებით მიღებული სარგებელი აჭარბებდეს ზარალს, ასევე შეზღუდვები არ უნდა არღვევდეს ადამიანის უფლებების ევროპულ კონვენციას.
ხელისუფლებას ასევე ადამიანების კარანტინსა ან იზოლაციაში გამწესების უფლება ექნება. თუმცა თითოეული ასეთი ადამიანი შეძლებს აიყვანოს ადვოკატი, ახლობლებსა და დამსაქმებელს აცნობოს თავისი ადგილმდებარეობა. ასევე ექნება უფლება იცოდეს კარანტინში გამწესების მიზეზები.
დღეისათვის საქართველოში მკაცრი შეზღუდვები მოქმედებს. ქვეყანაში გაჩერებულია საქალაქთაშორისო და საზოგადოებრივი ტრანსპორტი, სავალდებულოა პირბადეების ტარება, არ მუშაობს სპორტდარბაზები, კაფეები, რესტორნები, აკრძალულია კულტურული ღონისძიებების ჩატარება.
უფრო გამკაცრდება შეზღუდვები 3 იანვრიდან, როდესაც დაიკეტება მაღაზიები, რომლებიც დროებით საახალწლო დღესასწაულებზე გაიხსნა.