მიუხედავად იმისა, რომ სადაცაა ახალი წელი მოგვიკაკუნებს, თბილისის ქუჩებში თოვლის ნატამალი არ ჩანს — თუ მაღლობებზე შეფენილ უბნებს არ ჩავთვლით.
თუმცა ასეთ სურათს ქალაქელები მიჩვეულები არიან — უკვე დიდი ხანია თბილისში თოვლი იშვიათობადაა ქცეული და ზამთარში შემოდგომის მსუყე ფერები ჭარბობს.
დეკემბრის ბოლოს თბილისის ქუჩებში, როგორც წესი, საზეიმო ფუსფუსი და სამზადისია ხოლმე, განსაკუთრებით, „საახალწლო სოფლებში“. მაგრამ რადგან წელს კორონავირუსის პანდემიამ თავისი კორექტივები შეიტანა ადამიანთა ყოფაში, წინასაახალწლო ქალაქი სევდიანად გამოიყურება.