თბილისი, 22 დეკემბერი – Sputnik. შერიგებისა და სამოქალაქო თანასწორობის საკითხებში საქართველოს სახელმწიფო მინისტრის მოვალეობის შემსრულებელს თეა ახვლედიანს კორონავირუსი დაუდასტურდა.
გავრცელებული ინფორმაციით, ახვლედიანს ვირუსისთვის დამახასიათებელი მსუბუქი სიმპტომები აღენიშნება და მკურნალობის კურსს სახლის პირობებში, ოჯახის ექიმის მეთვალყურეობით აგრძელებს. ამ ეტაპზე მისი ჯანმრთელობის მდგომარეობა სტაბილურია.
შერიგებისა და სამოქალაქო თანასწორობის საკითხებში სახელმწიფო მინისტრის თანამდებობა თეა ახვლედიანმა მიმდინარე წლის აგვისტოში დაიკავა. ახვლედიანმა ამ პოსტზე ქეთევან ციხელაშვილი შეცვალა, რომელიც 22 მაისიდან საქართველოს მუდმივი წარმომადგენელია ეუთოს მისიაში და ვენაში მდებარე საერთაშორისო ორგანიზაციებში, ასევე საქართველოს ელჩი ავსტრიაში.
საქართველოში ახალი კორონავირუსით დაავადებულთა რაოდენობა ბოლო დღე-ღამეში 3.064-ით გაიზარდა და ინფიცირებულთა საერთო რაოდენობამ 212.526-ს მიაღწია.
საქართველოში კორონავირუსის პირველი შემთხვევა 26 თებერვალს დაფიქსირდა.