თბილისი, 21 დეკემბერი — Sputnik. თურქეთის ვიცე-პრეზიდენტი ფუათ ოქთაი პირდაპირ გამოსვლისას ცუდად გახდა და სიტყვის დასრულება ვერ მოახერხა, იუწყება თურქული მასმედია.
გავრცელებული ინფორმაციით, ინციდენტი მაშინ მოხდა, როდესაც ოქთაი კიბერუსაფრთხოების კონფერენციაზე სიტყვით გამოდიოდა.
სოციალური ქსელებით გავრცელებულ ვიდეოკადრებზე ჩანს, როგორ უჭირს ვიცე-პრეზიდენტს ლაპარაკი, როგორ ებმება ენა და მძიმედ სუნთქვას იწყებს, რის შემდეგაც დაცვასა და ექიმებს სცენიდან გაჰყავთ.
CNN Turk-ის ინფორმაციით, ვიცე-პრეზიდენტს წნევა დაუვარდა. ექიმებმა მას სასწრაფო დახმარება აღმოუჩინეს, ხოლო ჰოსპიტალიზაცია საჭირო არ გახდა.
ამის შემდეგ ფუათ ოქთაი სცენაზე დაბრუნდა და მადლობა გადაუხადა კონფერენციის მონაწილეებს გაგებისათვის. მისი ვარაუდით, ცუდად გახდომის მიზეზი შესაძლოა უძილობა და გადაღლილობა იყოს.